Una via
Una via
À misurà i ghjorni è cuntà i passi lazzi
Ch'aghju frustatu à pressu à tè
À tene a memoria da u stazzu à u palazzu
Mi sò scialbatu à pressu à tè
Chì ne senti tù fratellu caru caru
Di u tazzu nentru à mè ?
Tù chì ne pensi amicu paru paru
Di u vezzu à collu à mè ?
Ùn avia ch’è una via pè andacci
Una vita
Una vita solu una vita pè campacci
Una via
Aghju intesu u fragu, i fischacci
Ch'è tù mai ùn voli tace
À perde a memoria è tuppalla
Pianu pianu di bambace
Chì fanale verde o rossu vedi
Quandu u locu l'ai in manu à tè ?
Chì stangaghju apertu o chjosu credi
Quandu in locu ti pensi ind'è tè ?
Ùn avia ch'è una via pè andacci
Una vita
Una vita solu una vita pè campacci
Una via
Cum'è un tempu di dumane
Chì si campa oghje è avà
A storia dice guasi vera a verità
Cum'è un oddiu di dumane
Chì si campa à tempu avà
A vita ella face soia a verità
D'una via.
Lasciami sperà
Sò di quelle vuciate
I ghjorni di tribbiera
È di quelle impruvisate
Quand'era tempu di fiera
Di la gioia zitellina
È li balli indiavulati
È u saltu di a spiscina
È li basgi arrubbati
Mi vene u dulore in pettu
Quandu s'affacca l'inguernu
Eiu ùn possu stammi chetu
Quandu t'aspettu in darnu
Soga lu monde mudernu
T'apre tanti orizonti
Ùn la manda à caternu
L'acqua di li sacrifonti
Veni è fatti un'arretta
Femuci una raggiunata
Chì a vita chì t'aspetta
Vogliu falla furtunata
Tandu piglierai e strade
Chì ti feranu ingrandà
Ma teni à mente e to radiche
È pò lasciami sperà
È pò lasciami sperà.
Avà
Quante chjarantane schjariscenu le notte
È sogni secreti d'asserinà
Quante vele sparte à circà li so porti
Sceglii la to stella, hè ghjunta l'ora, avà.
Arruba l'ore à lu tempu, è le stonde à la memoria
È porta 'ssu vascellu da mare in là
Dopu à la timpesta voca nant'un mare d'oliu
Franca li l'arcani di u campà, avà.
Avà
C'hè un mondu novu à inventà
Tante passione à sazià
Abbranca la to vita avà
È per li ghjorni di primura
Ghjè a sicurezza in le to mani
Chì dà à lu sole la spera
Per tutti li to lindumani
Per tutti li to lindumani
Lascia suminà da li venti e to voglie
Elle stamperanu la to storia
È sè trà i fiori colti, ùn ci n'hè trifoglii
Fà d'ogni scunfitta una vittoria, avà.
Avà
C'hè un mondu novu à inventà
Tante passione à sazià
Abbranca la to vita avà
È per li ghjorni di primura
Ghjè a sicurezza in le to mani
Chì dà à lu sole la spera
Per tutti li to lindumani
Per tutti li to lindumani
Quante vele sparte
Voglie suminate
Abbrancati la vita
Sceglii la to stella, hè ghjunta l'ora, avà.
Adunì
Cumu hè a fiama
Ch’è tù voli purtà
È chì ne dice Mamma
Di u toiu l’andà
È ne voli dà lume
Quand’hè l’oscurità
Ci lascianu e piume
È ùn ci hè nunda à fà
O quant’ell’hè peccatu
Di vede la trimà
Ci ne taglia u fiatu
U soiu lu sperà
Adunì
U mondu chì move
È femu chì l’amore nove
Adunì
U mondu chì move
È demu ch’ùn l’anu ancu trove
Cumu hè a manu
Ch’è tù sai pisà
Ne dice l’umanu
Pè quantu forza ne hà
Ùn hè ch’è rispettu
È po sincerità
È po ti batte in pettu
L’altra via à signà
È quantu li ne dai
S’ella ne pò mancà
Quant’ellu ci n’hè guai
Pè a terra unità
U sole di mezanotte
Una brama di più
Guardu ghjelosu
U sole di mezanotte
Un pattone di più
Cum’è u bottu di l’acqua nant’à a teghja
Hè u mare chì vene
Cù e so mille racolte
È u portu chì para i marosuli forti
Hè l’avvene chì pichja
Cù i so centu culori
È a vita s’ingolle u so solu tesoru
Una casa di più
Contu ghjelosu
E chjave di e mo porte
Un marchjone di più
Cum’è u tangu chì s’inviglia a rosula
Hè u mare chì vene
Cù e so mille racolte
È u portu chì para i marosuli forti
Hè l’avvene chì pichja
Cù i so centu culori
È a vita s’ingolle u so solu tesoru
Hè u mare chì vene
Cù u so solu rimore
In un portu chì si crede
Di centu culori
Hè l’avvene chì pichja
Cù e so mani forte
È a vita e si piglia
Pè spalancà e porte
T'aghju in la mente
A luce ùn hè ancu pisata
U mare lascia affaccà
Ragii d’oru à sbaccunata
Chì invitanu à spaisà
U to matticciu mi rammenta
E malannate è po u stantu
A scrigna in u sulaghju lenta
E straziere di u mo pientu
Quandu chì l’alba dice digià
I frastorni di l’annuttà
Quandu chì l’alba dice digià
Ch’o parteraghju per ùn vultà
Chì l’aghju in la mente…
Ùn sò e lune à amparammi
Mancu e stelle à cantà
E libertà innacciarate
Ne e sciappulate à ballà
Seraghju stata troppu fieru
Per aghjumpammi è capicalà
Ai una giuventù altiera
È i mo sonnii à inventà
Quandu u tramontu dice digià
I sciali belli di u sveglià
Quandu u tramontu dice digià
Ch’o parteraghju senza vultà
Quandu u chjarore dice digià
E voce bone à ascultà
Quandu u chjarore dice digià
Ch’è tù mi ferai vultà
Chì t’aghju in la mente...
Un'antra storia
À l’ore più crudele
Voli dà li a pace
Preferì li u mele
A gioia ch’ùn si tace
À issa manu ch’aiuta
À l’amore umanu
Ne cunnosci l’esciuta
N’aspetti u veranu
À st’altre cantilene
À e sperenze meie
Barrattà le e pene
Contr’à so chì rincheie
Un’altra storia, voli scrive
Un’antra storia
À le to rive, voli vive
Un’antra storia
Un’altra storia, voli vive
Un’antra storia
À le to rive, voli scrive
Un’antra storia
À l’ore più felice
Voli dà li un sensu
Ùn fà mai più nice
Sott’à u celu immensu
À e to vechje lotte
À so chì face male
Lasci corre a notte
A vita di più vale
À st’altre cantilene
À e sperenze meie
Barrattà le e pene
Contr’à so chì rincheie
Sessant'anni ad avà
U silenziu accampa a casa in la bughjura
Di li soli, di l'ore, ci n'hè poca primura
Longu hè statu u viaghju, cum'è a storia à cuntà
D'una prumessa fatta, sò sessant'anni fà
A polvera s'hè sparsa annant'à la mubiglia
Affosca pianu pianu u ritrattu di famiglia
Ch'ella sia spapersa, ch'ella sia addunita
Ghjè u più bellu rigalu chì vi hà fattu a vita
Quanti n'avete varcatu verani è staggione
Ùn si pò accertà ch'ella hè stata passione
Cun lite appaciate, vintu lu crepacore
Sì chì l'avete campata una vita d'amore
Quand'ellu ti rimira alluppiata in lu futogliu
Chì seranu i ricordi, furtuna o curdogliu ?
Una carezza à la to manu, è la so mente fughje
È pensa à 'sse stonde chì più nunda pò strughje
È puru sè la neve imbianca la vita
Chì a falcina aspetta per l'ultima ferita
Esse vechju ùn hè esse fora di tuttu
U castagnu centannincu dà sempre lu fruttu
Quanti n'avete varcati verani è staggione
Ùn si pò accertà ch'ella hè stata passione
Cun lite appaciate, vintu lu crepacore
Sì chì l'avete campata una vita d'amore
Forza di l'Esse
Tù chì sumeni a Parità
Una furtuna per ogni campà
Ma lu rispettu di ogni vulè
Hè sottumessu à lu to parè
Nant'à lu solcu di Fraternità
L'arcubalenu di l'umanità
Disoccupata hè la ghjuventù
Eppuru ci crede è ancu di più
Forza di l'esse oramai à lentà
Ùn c'hè parata à pudè la fermà
Forza di l'esse, una mossa à purtà
U raggiu di sole per un mondu chì và
À barculà l'omu cù a to Libertà
Un ideale chè tu voli annacquà
D'una battaglia ùn pò nasce un amore
In u desertu ùn ci pò cresce un fiore
Ma in la terra di lu mio bramà
'Sse trè parolle ùn ponu bastà
Ghjè lu pudere di la mio virtù
Chì mi face crede, è ancu di più
Forza di l'esse oramai à lentà
Ùn c'hè parata à pudè la fermà
Forza di l'esse, una mossa à purtà
U raggiu di sole per un'mondu chì và
Hè ora digià
U sentu digià l'alitu di li so sussuri
Di quelli chì, di tè, di mè, ùn sò sicuri
Dà a gioia à le to pene, è l'ore à l'eternità
Eccule quì e meie e strenne, ti vogliu campà
Ùn ti prumettu ciò ch'ùn aghju
Ma sò ciò chì ti possu dà
Femu lu inseme 'ssu viaghju
Hè ora digià
È quandu a vita sparghjerà tutti li so turmenti
Tandu l'affollu serà quì per siccà li pienti
Hè torna longu lu caminu ch'ellu ci ferma da fà
È Diu solu sà induve ellu ci purterà
Ùn ti prumettu mondi è mari
Fole ùn ne vogliu cuntà
Cappiemu oramai tutte l'amarre
Hè ora d'andà
Ùn ti prumettu ciò ch'ùn aghju
Ma sò ciò chì ti possu dà
Femu lu inseme 'ssu viaghju
Hè ora digià
​
​
