esciutu in lu 1995
Sorti en 1995
Sintineddi
SINTINEDDI
( F. Lanfranchi / N. Luciani )
Tali un ochju lampatu à u mare latinu
O una mani porsa à l'imperi à liventi
Un sognu maladettu d'eternu scarpiddinu
O una chjama antica chi più nimu n'ùn senti
Tali i voci chi funu da culandi à l'ora
E li visi di petra chi dissinu di no
Quidda sumiglia strana chi ùu si volsi mora
E l'idea chi tandu tuttu qui principio
Tali a mani chi vensi in tempu d'ancu à fà
E vi feci d'altura cù quiddu arti supranu
Un era ancu lu mondu é n'erati digià
Guardiani impitrati di u ricordu umanu
Tali l'abbracciu primu chi u silenziu vi deti
E li sapienzi arcani cù li so canti immersi
Di cio chi ùn hè storia tiniti li sicreti
Tali una citatella chi a mimoria persi
VIAGHJI
( Ghj. Fusina / Ghj. F. Leschi )
Da scopre venti simu nati
Cum'è l'acelli benedetti
Chì si lascianu nidu è tetti
Quand'ella vene l'inguernata
Simu sempre à valisge fatte
Simu sempre à mezu à le mosse
Pocu ci impremenu le scosse
È pocu dinù le disfatte
Cum'elli sò belli i viaghji
L'avviò li treni è li battelli
È di stradò li riturnelli
Cù centu mila paisaghji
È po li cavalli d'idea
I più maravigliosi sogni
I più primurosi bisogni
A nostra più bella epupea
Ma chì ci moverà le voglie
Chì ci mette l'ale à i pedi
È ci accarezza vulinteri
Cum'è l' acqua nantu à le foglie
Quand'ella corre liberata
Ch'ella canta e so canzone
Nant'à a rhingera di u balcone
È ch'ella leva una ventata
Simu di quelli di partenza
Simu di quelli di vultata
Cusi rinova l'abbracciata
Cusi rimboba la sperenza
E MUNTAGNE D'ESE
( Ghj.P. Poletti )
Qui sò surgenti curtese
È di lume l'eternu sugiornu
Quassù per e muntagne d'Ese
Sè tù ci torni mai un ghjornu
Di silenziu n'aghju un tesoru
È un ricordu di quelli ochji d'oru
Quì cantanu mille fole
A' e frebbe d'inguernu intrecciate
Da Tarmini à Scaldasole
A foce d'astra calma in le fruppate
Di bellezze n'aghju un tesoru
È un ricordu di quelli ochji d'oru
Quandi ferraghju ni hè chjosu
In le furie di i venti suprani
Altieru canta Renosu
Cun centu cialambelle in le mani
D'armunie n'aghju un tesoru
È un ricordu di quelli ochji d'oru
Di sogni e d'orizonti
N'aghju li prufimi discreti
Di l'Amicizia di' ssi monti
Ne tengu i quaterni secreti
Di sole è ventu n'aghju un tesoru
È un ricordu di quelli ochji d'oru
U VALDU DI A LAMA
( Paoli lu Soriu )
Da lu valdu di a lama
Scrivar vogliu sta nuvella
Per mandala par vallonu
Ad'Anghjulina a mio surella
Ch'ella stighi allegra è cuntenti
Ch'ùn li mancarà niente.
Lu me poghju di Perettu
Lu vogliu tuttu impiigà
O lu me primu sughjettu
Lu me ziu Antonu Scia
Lu so vinu mani è sera
Mai li vurrà mancà.
Tra mè è Antonu Tabura
C'era statu un sott'intesu
À la dispensa di Bura
Verificatori di pesu
Legnu scorsa è carbonu
À mità incù lu patronu.
Poi c'hè Dariu Pulindinu
Chì hè un omu di gran'valori
Ad'eddu ùn li piacì più vinu
Ùn bii più chè licori
La so sola midicina
Ni saria Fillippina.
Poi c'hè Paulu Castillinu
Chì hè omu di a me famidda
Hè asatu in la muntura
È li tinarà la bridda
À lu cavaddu filatu
Quand'è saraghju spusatu.
O lu to nomi Pazzali
Tona in tuttu in lu vangonu
Agna, Bura è Chisà
Facini un forti risonu.
Sona cetera è viulinu
Par ludar à Pulindinu.
Poi c'hè Ghjacumu Scia
Chì hè struitu è di bon senzu
U faremu sicritariu
D'altri cosi lu dispensu
È sarà pagatu a tara
À la banca di Chisà.
À Lillu a me sputagna
Li segnu lu passaportu
Di cullar à la muntagna
Ch'eddu ùn si lasci fà tortu
Alta pulizza è baronu
Da lu Tortu à lu Cuscionu.
A DOTA
( Tradiziunale orezzincu / M. Cacciaguerra )
Mamma hè vechja è sola in casa
Dunque mi trovu obligatu
Piglia moglia s'eiu la vogliu
Per ùn marchjà più strappatu
Tutti mi danu cunsiglii
S'eiu la trovu ch'eiu la piglii.
Quist'annu vogliu piglià moglia
Ch'aghju una bella piantata
Suminata hè à sette libre
Spergu in Diu sia bona annata
Mamma ùn pò in casa è fora
Ci vole ch'eiu ghjunghji una nora.
Noi simu dui fratelli
À sparteci un gran'casale
U primu chì si marita
Piglierà induve ella li pare
È parti l'hà fatte mamma
Testimoni ùn si hè chjama.
S'ella hè quante à la mubiglia
À mè nunda n'ùn mi manca
Aghju lu mio tavulinu
A mio meria è a mio panca
Una bella caffittera
Quattru piatti è una suppera.
In qualità di vestume
Propiu nunda nun mi manca
Aghju duie camisgiole
Una hè brutta è l'altra hè bianca
Hè vera scarpi ùn hè aghju
Quist'annu li cumpreraghju.
Dinò ci vole ch'eiu mi compri
Un pezzacciu di barretta
Un paghju di pantaloni
Un ghjileccu è una ghjacchetta
È pò allora aghju ogni cosa
Ùn mi manca chè la sposa.
Aghju un bellissimu lettu
Di li più fine castagnu
C'hè cuvertoghje è lenzole
Di cuprimi nun mi lagnu
Aghju un bellu strapuntinu
Un saccone è un cuscinu.
Quì finiscu o damicella
À ludavi lu mio casale
Sè voi vulete fà un capricciu
Incu mè ùn ci starete male
Eiu voi fratellu è mamma
Serà pane biancu in brama.
BEAL FEIRSTE
( M. Cacciaguerra )
Un ghjornu per furtuna scalai in questi lochi
À vede cristiani piatassi per pregà
Un Diu ch'ùn pò chè interra li so morti
Cerchendu cumu fà.
Per scioglie'ssa disgrazia ch'elli chjamanu guerra
Trà fratelli di sangue è nò di civilità
Ognugnu suttumessu per forza à la Regina
Chì ci vole a rispettà.
Beal feirste sì cità marturiata
Beal feirste o chì vita straziata.
Mà in st'isula pinta di mare è di virdura
C'hè una ghjente di core chì s'offre u so campà
Senza nisuna stizza per la so sepultura
U celu a saperà.
Cumu cresce la luce quella mane à bon'ora
trà luna vechja è sole omu ùn si pò sbaglia
Cumu cresce l'omu à mez'à la nigrura
A vita libera.
È puru di'ssu mondu tutti ne sò fieri
Di pretende salvà a nostra umanità
Ùn feghjenu chè l'altri in paesi strangeri
Bramendu a libertà.
O populu d'Irlanda fà sunà lu viulinu
Tamburi è caramusa per pruvà d'innacqua
L'avvene chì ferà girà lu mulinu
Di a to fraternità.
Beal feirste sì cità marturiata
Beal feirste o chì vita straziata
Beal feirste sì cità marturiata
Beal feirste o signore pietà.
IN MEMORIA
( F. Raffali / N. Luciani )
Per un populu vivu
Chì un vole esse domu
Per un zitellu chì dumane
Serà omu
Per quellu chì d'amore
Vole pude campà
Per quellu chì in prigiò
Ùn ci hà nunda à chì fà
Per stu pezzu di terra
Chì deve firmà nostru
Per stu cellu turchinu
È stu mare d'inchjostru
Per una casa vechja
Chì ùn vole sprufundà
Per una strada nova
À meza oscurità
Ùn aspetta dumane
O fratè, ùn aspetta
Quale ella sia a manera di lotta
Dumane
Per l'omu affunatu
O schiavu di un patrone
È chì deve piegassi
À ciò ch'ellu l'impone
Per quellu chì dumane
L'impiegu perderà
Per una donna
Chì si vole liberà
Per tutti quelli chì
Un ghjornu sò cascati
À un campu d'onore
Feriti marturiati
Luttendu per a patria
Vulendula salvà
Per a nostra memoria
Chì ci aiuta à sperà
Ùn aspetta dumane
O fratè, ùn aspetta
Quale ella sia a manera di lotta
Dumane
PIU CHE U SOLE
( Ghj. Fusina / Ghj. F. Leschi)
Più chè u sole è più chè u mare
A lingua st'isula l'hà fatta
À tempu à una sorte matta
Più chè u sole è più chè u mare.
Da la so lingua hè cum'è nata
Da la so voci è li so canti
Da li so scritti tutti quanti
Da la so lingua hè cum'è nata.
Sò'sse parulle à falla viva
Di li pueta tutti pari
Ch'ella hà tenuta cusì cari
Da l'alta serra à longu riva
Sò'sse parulle à falla viva.
Puru la più bella natura
Hè pocu senza puesia
Per esse ognunu qualchissia
Da l'altri ne vole primura
Puru la più bella natura.
Hè strappatura ancu l'amore
Sott'à u silenziu di u celu
Hè mutu u sintimu sinceru
S'ell'ùn hà musica à u core
Hè strappatura ancu l'amore.
Più chè u sole è più chè u mare.
DONNA NERA
( tradut. Ghj. P. Poletti )
Donna, donna
Di pelle difesa
Induve vai à rigiru di notte
In li pini, in li pini
La mio deda incesa
À u ventu di qualchì immense lotte.
Donna, donna
Di l'ochji à la luna
Dimmi tù qualchì verde campile
In le fole, in le fole
Di bona furtuna
Induve si dorme senza fucili.
Donna, donna
Di le to ferite
N'aghju fattu un cantu d'amore
Per i ghjorni, per i ghjorni,
Di e mosse tradite
Di turnà à imbelisce l'ore.
Donna, donna
Induve vai tù ?
LETTERA D'ARGENTINA
( F. Lanfranchi / N. Luciani )
I loca di quì
Sò fatti à lu to parè
Vularia chì
Tuttu firmessi par mè
Ma u tempu si sbucina
In'ssa terra d'Argentina
Quale à pò sapè
Chi hè la mio vita avà
Qualcosa di tè
Chi fermà in li ghjorni à fà
Chì lu me passu strascina
In'ssa terra d'argentina
Com'è l'armunia strana
Chì risona tantu è più
Com'è a terra luntana
Di a nostra giuventù
Com'è quidda casa vechja
È lu paesi culà
Com'è tanti fole à vechja
Chì tu sapii cuntà
À chì po ghjuvà
Di ramentassi dinò
È chì firmara di li ricordi chì sò
Chjusi in l'ora citadina
Di sta terra d'Argentina
Tuttu ciò chì fù
Ùn mi ne possu scurdà
Ma dimmila tù
Chì ferma in li ghjorni à fà
Chì lu me passu strascina
In'ssa terra d'Argentina
Com'è a piazza tamanta
Duve andavamu à ghjucà
Com'è 'ssa risa chì ùn pianta
In fondu à mè di chjamà
Com'è li passi sicuri
Chì tu purtavi quassu
Com'è li chjassi primuri
Di la noscia giuventù
È tù...
TU DUMENICU
( Ghj. P. Poletti )
D'ottobre in zerubia a luna cusì bella
È u ventu in furesta viulineghja in li pini
A notte di vaghjime aspetta un'antra stella
Da i Martini à siò marchjanu clandestini
E tù Dumenicu, ribellu di cugnome
Chì ùn vulia mai dorme
E vostre le vittorie eranu silenzione
A gloria sai bè, ùn canta chè un ghjornu
Quantu funu i cumpagni di 'sse mosse furiose
Chì partianu fieri senza pregà ritornu
E tù Dumenicu, ribellu di cugnome
Chì ùn vulia mai dorme
È oghje senti di chì ogni passatu hè mortu
Chì li fiori S'annoianu nantu à e tombe vechje
Chì hè megliu à ùn circà qualè chì avia tortu
S'imbrutta la memoria in certe bocche techje
E tù Dumenicu, ribellu di cugnome
Chì ùn vulia mai dorme
Oghje nantu à 'ssi chjassi pascenu i muntoni
Di quandu in quandu i neri intisgianu i bianchi
Chì dicerianu avà Giusti è Mondoloni
È tutti i to fratelli cù i sò fucili stanchi
E tù Dumenicu, ribellu di cugnome
Chì ùn vulia mai dorme
D'ottobre in zerubia a luna cusì bella
È u ventu in furesta viulineghja in li pini
A notte di vaghjime aspetta un'antra stella
Da i Martini à siò marchjanu clandestini
Tù dumenicu
Ribellu di cugnome chì ùn vulia mai dorme
DIANA DI L'ALBA
( Tradiziunale zicavese )
Diana di l'alba
Stella nel cel vermiglio
Sè tanta bella
Chè sei la maraviglia
Tù sè com'è la farfalla
Dunde lu focu s'appiglia.
Eo non sò lupu
Nè voi agnella seti
Datemi un basgiu,
Chì tanta bella seti
Sè nisunu ùn lu pò spigna,
Voi spigna lu pudeti.
Quandu lu ghjattu
Farà pace incu lu topu
L'onde del mare
Si siccaranu al fondu
L'onde del mare non seccanu mai
È voi podreti succora à li me guai.
LLEGO CON TRES HERIDAS
( M. Hernandez)
Llego con tre heridas,
La del amor, la de la
Muerte, la de la vida.
Con tres heridas viene
La de la vida la del
Amor, la del muerte.
Con tres heridas yo
La de la vida, la de la
Muerte, la del amor.
RIMORI
( N. Luciani )
Rimori, rimori
Rimore d'un tempu andate
Ribomba in mè
Rimori, rimori
Rimore d'un sangue caldu
Mischiatu in mè
Paradisu o infernu
Per una giuventù
Tela di sempre eternu
O purtellu apertu
Paradisu o infernu
Salvezza o servitù ?
Rimori, rimori
Di rabbie assufucate
Tremanu in mè
Rimori, rimori
Tante voce spurgulate
Vicinu à mè
Paradisu o infernu
Per una giuventù
Tela di sempre eternu
O purtellu apertu
Paradisu o infernu
Salvezza o servitù
OGNI PALMU DI STA TERRA
( M. Acquaviva )
S'hè distessa ind'è l'aria un affanatu di morte
È sò fatti di marmaru i visi sottu à lu sole
Sò d'abbissu i silenzii è in pulvina e fole
U mondu incredilitu sbattutu hà e so porte
Caminerà ab eternu 'ssu stolu senza fine
Cù a to sipultura sdresgiendu ogni bagliore
È chì facia ruvidu u trimendu dulore
Chì rode u campà à 'sse ore visparine
È stu sole di nuvembre annantu à la to bara
Sarà ora ascuratu è ora maestosu
Ma turnerà dinù di 'ssa terra u sposu
Cun ellu vulterà a to mimoria cara
Di tè mi firmerà più chè un visu culpitu
Più chè un dolu pisiu colmu di mille pene
Mi firmerà u vede di 'ssu spaziu infinitu
Chì lu to passu scrisse à stampi per l'avvene
Mi firmeranu è voci chì à l'altare s'alzonu
Per invade sti celi cun parolle di cera
È chì correnu in mente tale un furiose tonu
Chì va è nè scumponea matina è a sera
È quandu in tempi à vene invechjerà u ricordu
Ogni palmu di sta terra si purterà à l'iglia
Un sognu fattu veru chì in un intimu accordu
Di tè si n'averà qualchì fidà sumiglia.
​
​
