Passagera
Porti
Di u portu in sussuru
Anima à tempu nata
A luce ti pigliò
Per insignà a strada
Un trattu si pisò
L’idea d’un viaghju
Chì tandu principiò…
U mondu, u mare
L’altrò
Duve vanu e vele
A u ventu ideale…
Di a to zitellina
Cuntrastanu i moli
Batte u sciappittime
Di a schjuma zergosa
Sghjumellanu i so canti
E sirene laziose
E tù posi pensosu…
In poppa i to sensi
A to vela si pesa
Sò l’isule quallà
Chì si sveglianu, trè
Voca u to vascellu
A sculinà paesi
Sì capitanu è rè.
L’infinitu palesu
Al dilà di e terre
Un ragiu si ne more
Ti fughjenu e sarre
Hè solu acqua in bullore
Scritta in l’eterna stesa
A to storia d’amore.
U mondu, u mare, l’altrò
Duve vanu e vele….
Maestru Caravaggio
Ti piacia u bughju
Di e taverne tetre
Duv’è ogni muscu gosu
Ti purghjia una fiura
Quantu fù generosa
A vita in chjaru è scuru…
Fù riveritu l’omu
E celebrata l’arte
Da tanti preputenti
E st’epica fù toia
Trà u lussu è u lozzu
Fattu n’ai a prova
Ch’ùn pò esse a luce
Senza l’oscurità.
Ribomba un innu novu
Trà ricciuli è curone
U calice hè surgente Maestru
In u to cantu.
I guaglini fangosi
Ti porsenu e donne
A frebba di i carrughji
I to più belli amanti
È ne festi una vergine
Di Lena a puttana
Cum’è mughju di vita
L’offerta nudità.
Nantu à a tela d’oliu
A buriana s’hè rossa
In e stofe in e mosse
U tempu ci s’attonda
Immaculatu è mondu.
In la to voce
À l’ispensata tù
Cum’è un scalu chì salva
E u rispiru longu di l’alba
Una spiscia di lume in i to ochji balla
E l’orizonte s’apre…
In a to voce sentu a carezza di u ventu…
À l’ispensata noi
Pè fà bella a notte
A l’oru di u tramontu sciolta
Sò cheti i paesi à ghjace i destini
Si spendecanu l’ore
Ci sò mure turchine
È issu noi m’avvinghje
U fiatu, u battime
Senza dopu nè prima
È issu noi m’avvinghje
In a to voce sentu a carezza di u ventu
A mo pazzia
Sò lochi quessi da duve vengu
Orfanii è persi, sò lochi vani
Da duve mughju eiu l’umanu…
Sò lochi vechji d’avvene muti
Duv’è si spechja l’anima
Sola oramai…
Sò lochi immensi di nebbie pagne
Pianure immerse sottu à u ventu
Lochi rivolta d’idea sciolta…
Sò lochi vechji d’avvene muti
Duv’è si spechja l’anima
Lochi di pene orrende
Pè a ùo notte errente
Oramai
Sola oramai…
Scalu
Date mi i visi è i carrughji
Date mi isse fantasime
Chì filanu
Senza retta nè fine
Date mi l’ochji tanti è i zitelli
Date mi i cumpagni
E l’amichi à millaie
Ch’o pigli appellamanu
Date mi isse vicende
Battelloni pisii
Di parte è di vultà
A so storia chì batte
Di fanga è di fumaccia
Date mi e stagione ardente
E i vaghjimi folti
Di e parolle nove
Date mi a ghjente
E date mi u cantu
U ribombu chì volta da i celi
U muscu d’ogni stonda sciolta
Nantu à a pelle
Date mi isse vicende
Di passighjate notte
Di luce bianca è finta
Torna una volta
Torna una volta…..
In tantu
In tantu ch’ella sia l’ora
Da sopra à e parolle tutte
Ch’ùn emu dettu
Ch’elli ciottinu in noi tutti i ghjorni
Cum’è tante carezze
In tantu ch’ella sia l’ora
Da sopra à i punenti tutti
Ch’ùn emu lettu
Ch’elle s’alzinu in noi tutte
E notte cum’è tante prumesse
Intantu…
Passu à passu avà
Scalza vò nantu à e cote
Chì sonanu nere.
In tantu di truvà u veru
In fondu à issu mughju di noi
Ch’emu strappatu di stintu è di zerga
U frombu turchinu mezu à tante timpeste
In tantu vogliu sta canzona
Da i culori tepidogni ch’è n’emu ansciatu
Un’aria linda chì ribomba
U versu ch’è no averemu sceltu
Intantu…
Sarà quessu u mo chjassu
Avà
O di fele o di mele
Quale hè chì sà ?
Sarà quessu u nostru cantu avà…
Quale hè chì sà ?
Passu à passu avà….
Amazunia
Oghje hè piantu u tempu di l’acqua
Hè di frombu quellu di a scorsa
Oghje hè brusta u tempu di u celu
E di cennera quellu di a sorte
Hè di lume a Sierra Smeralda
Hè di frasca l’omu chì s’avvia
Ma l’idea d’avvene suspira
O furesta u nostru fiatu spira
Cun tè Amazunia…
Amazunia Selva maestra.
Hè surgente a donna spugliata
Armunia u corpu chì s’attonda
U so cantu hè d’immensità
Ecu in fondu à l’umanità
Amazunia billicu è corpu
Core è rispiru d’una rivolta
Amazunia u mo rispechju
Verde reame spiritu vechju.
Amazunia…
Tù sì l’oru ch’assuva a vita
Fiume sacru da curà ferite
Quandu l’omu lagna è s’addispera
Fermi tù cum’è l’unica spera
Per noi Amazunia…
Solu celi
Move l’azurru spustendu l’ombra
Di u mo sguardu si piglia l’onda
È ci sì tù cum’è un pezzu di tempu
Rinaghju caldu duv’è ghjacenu venti
Ti vogliu dì e mani offerte
Cù e mo brame à core spartu
Da visticà i chjassi di u to sonnu
Sveglià mi cheta in l’ortu di u to sognu
Celi solu celi da nanzu à noi
Celi solu celi gonfii è prufondi …
Di vene in fiume cum’è a piena
Stonda chì batte in u mo senu
Memoria intinta d’alba imbalsamata
Di mele sì è di sale impastatu
Sì a mo sete chì mai stancia
Un ragiu coltu à l’ora mansa
Scalu scunfine di u mo viaghju
Marosu è sole in bocca à l’aduchjata
Nantu à u filu di e to labre sole
U fiatu meiu.
Un nome
À collu u to fangottu
Di miseria cusgitu
Di issa terra ferita
Ti lachi l’ortu
Per impettà a vita
Chì t’apre le so porte
S’è dumane t’invita
Chì ne sarà a sorte ?
S’hà pigliatu a guerra
E rise è e canzone
S’hè pisiu u sole
Svanitu u cantu
È ti lasci l’agnone
Ti ferma solu un nome
Da inventà d’altre fole…
Francà l’onde di u mare
Senza sapè chì mondu
In u ballu di a ronda
I destini ùn sò pari
Sottu à chì celi novi
L’ore sbucinerai
Chì chjassu sarà toiu
Chì furtuna o chì guai ?
È sì scalatu quì
Giuvanottu valente
A spone u to fangottu
Di polvera è di stantu
Pè truvà ci un agrottu
Un core una surgente
L’amore cum’è un portu…
Ti ferma solu un nome, un esiliu, una spera
Pè a terra diletta duv’è tù ti ne vai…
Segni
Segni in e to mani aperte
Cù a to voce in preghera
Segni d’oghje è segni d’eri
Segni in senu à u mondu
Segni da scioglie malanni
E a luce cum’è un spechju
Segni d’onda segni vechji
Segni di celi ribombu
Fonte di vita à la cunfine
Sò i destini.
Segni d’oliu à a to fronte
Cù u secretu à e labbre
Segni di l’isula madre
Segni di l’antica sponda
Segni in l’ochju di u tempu
U gestu si face ballu
Segni magia chì salda
Pezzi à pezzi
a nostra stonda.
Fonte di vita à la cunfine
Sò i destini.
U mondu in e to mani
À tè chì porti u mondu in e to mani
Pè i to sogni di granu è di pane
È u to sguardu d’acqua linda
Duv’ellu rughje l’oceanu
Pè e to sperenze scarnite
E tutte e prumesse vane…
À tè u sale di a terra
À tè a pace
À tè a voce di l’umanu
À tè chì porti u nome di a to terra
Pè i to pezzi di storia à focu è ferru
A sete vechja chì s’appuppa
À una lacrima sfiatata
Pè l’orizonte chì s’intuppa
À u to celu chì si caghja
Solu cunnosci a calcina, u sudore
L’ore spiumbate di e to notte in catalettu
U basgiu amaru d’un sole senza calore
A pena viva è u so morsu in u to pettu…
Surella
Anch’eiu sò di quelle
In a notte chì vanu
À cunsumà e stelle
In l’isula sumiglia
U silenziu hè di rena
Cum’è l’oru à e labre
U ghjornu in a calata…
Anch’eiu sò cum’è tè…
Insegna mi a luna
duv’è tù stai ascosa
è tessi mi una funa
U chjassu di e vite
hè di petra è di brusta
ma u tempu chì s’apre
hè d’azurru stampatu.
Sì mossa, sì l’onda
Sì spechju, sì mondu
Sì terra è sponda
Sì solcu è stonda...
Mucanu e ferite
E partenze è l’addii
E prumesse sbandite
Da tè sbuccia u cantu
L’alba senza catene
Cum’è ragiu di pace
In core à l’attrechjata.
Anch’eiu sò cum’è tè …
​
​
