esciutu in lu 1978
Sorti en 1978
Nant'e u solcu di a storia
A FATA
Quassù nant'à muntagna
In ped'à a una funtana,
Una fata, una fata.
In la sera incantata
Natura s'hè vultata,
Inamurata, quand'hè nata.
Aprimi lu to core,
O surgente d'amore,
Sempre fida, sempre fida.
Per scunghjura la morte
Aprimi le to porte,
Di la vita, infinita.
Aspetta lu veranu,
A fede di l'umanu
Chè tù teni, chè tù teni.
M'imponi a verità,
Ti chjami a libertà
Incù fede mi susteni.
Ma di stu locu santu
Smariscerà lu cantu
Di a fata, di a fata.
Per batte d'altri lochi
Duve nascenu li fochi
Di a rivolta, di a rivolta.
TRÀ LE SPONDE
Trà le sponde u fiume corre
Nunda nun lu pianterà
In l'omu c'hè oddiu è amore
Nimu nun li stracchera.
Cusì hè lu nostru passu
D'omi arritti pè luttà
Senza timore senza fracassu
Di forza ch'ùn si po parà.
A muvra corr'à lu veranu
Ascosa da li monti cari
Ùn manghjà più dentru la manu
Ferita da ricordi amari.
Cusì lu corsu sterminatu
Di repressione è da la guerra
Culunizatu è spugliatu
S'arampicheghja la so terra.
L'acellu canta la so vita
È ancu pienghje li so guai
Ma per ellu mai finita
Hè la so lotta di libertai.
Cusì sempre la mio Nazione
Hà mughjatu ciò ch'ella stanta
Oghje di a vita hè testimone
Chì u populu sempre canta
LIBERTÀ !
PRIGIONE FRANCESE
In e cellule di francesi
Ci sò Corsi incatenati
Luntanu da li paesi
Privi soli addisperati
Per avè pensatu corsu si sò trovi incarcerati.
Per avè pensatu corsu si sò trovi incarcerati.
S'ell'ùn hè corsu lu sangue
Noi ne simu la cagione
U ministru di l'internu
Forse mi darà ragione
Ellu ci vulia mette per sempre lu cavizzone.
Ellu ci vulia mette per sempre lu cavizzone.
Curaghju li mio fratelli
Ch'ell'ùn vi scappi la fede
A sperenza hè una surgente
Chì face stancià la sete
Hè una forza divina chì face francà le rete.
Hè una forza divina chì face francà le rete.
Ma ùn site micca soli
À mez'à sti quattru muri
Un populu v'accumpagna
Ne pudete esse sicuri
Quellu di li veri corsi ch'anu sappiutu stà puri.
Quellu di li veri corsi ch'anu sappiutu stà puri.
MUSICHELLA
Bella farfalla cun tè vogliu ballà
Fà una ronda trè giri è po scappà,
Fà una ronda trè giri è po scappà.
Bella muvrella cun tè vogliu salta
Per la muntagna trè notte è po scappà,
Per la muntagna trè notte è po scappà.
Bella surgente cun tè vogliu cantà
La to canzona trè versi è po scappà,
La to canzona trè versi è po scappà.
Bella ciccona cun tè vogliu sunà
Tutte le mane trè chjocchi è po scappà,
Tutte le mane trè chjocchi è po scappà.
Bella stagione cun tè vogliu campà
Tramezz'i fiori trè mesi è po scappà,
Tramezz'i fiori trè mesi è po scappà.
Bella zitella cun tè vogliu parlà
D'amore dolce trè ghjorni è po scappà,
D'amore dolce trè ghjorni è po scappà.
O bellu sognu cun tè vogliu arrubbà
A la mio vita trè ore è po scappà,
A la mio vita trè ore è po scappà.
LOTTA SI CHJAMA VITA !
Una luce passeghja
In lu cap'abbughjatu
Ma qual'hè chì la feghja
À buleghja à u passatu.
Idee intrecciate
Da ligamì lu vulè
Trà di elle intravate
So le radiche in mè.
O beata rustaghja
Da pulì la furesta
Chjara cum'un aghja
Hè per mè una festa.
"Lotta si chjama vita
a to Nazione more !"
Mughja una voce arghita
In fond'à u me dulore.
Aghju trovu a certezza
Vicin'hè a lumera
Esiste debulezza
Di francala si spera.
Sperenza senza lotta
È fame senza pane
Ùn c'hè chì la rivolta
Per crea lu dumane.
Iè dumane nascerà
D'una vera sustenza
Un populu di campà
Hè venutu in cuscenza.
"Lotta si chjama vita
a to Nazione more"
Mughja una voce arghita
In fond'à u me dulore.
DA CULANDI À'SSU MARE
Da culandi à'ssu mare
Ancu ad ochji chjusi
T'induvinu è ti senti
Luntana è vicina à mè.
Da culandi à'ssu mare
Ci sè tù,
Da culandi à'ssu mare
Ci sè tù.
Oghje sè culor'd'oru
È di casci russicci
Staccati da lu ventu
Si copre la to terra.
Da culandi à'ssu mare
Ci sè tù,
Da culandi à'ssu mare
Ci sè tù.
S'arrustanu i castagni
Inturniati à i fucari
Pinsendu à tutti li fiori
Di u branu vicinu.
Da culandi à'ssu mare
Ci sè tù,
Da culandi à'ssu mare
Ci sè tù.
Imbiundisci lu fenu
Aspittendu'ssi tempi
Chì l'omi è e donne
Faranu à furlanera.
Da culandi à'ssu mare...
CREDENZA
Aghju credutu di vede per annant'à lu stradone
In lu ventu chì curria a stampa di un strione
S'hè incesu in la mio mente un timore anticone.
Aghju credutu di sente in la corsa di lu fiume
A voce di lu mazzeru po s'hè persa nù le schjume
M'hè parsu nant'à l'acqua vede sparghjesi un lume.
Ci sò gattivi sughjetti sempre pront'à annuchja
Sè la disgrazia vi tocca l'ochju fatevi lu signà
Ci sò le ghjasteme perse sempre pront'à amazzà.
Mi pare chì la natura hè tracarche di parolle
Le magie di l'antiche sò sicuru nun so fole
Ci sò le forze suprane in la notte o à lu sole.
BRANU
U sole spazza di i so raghji li furesti spimpillanti dop'à un piovu d'aprili.
Luccicheghja à mez'arburi un paisuchju.
Un aceddu chjuchjuleghja è rinnasce a natura chì s'era lasciata alliscia da i gocci freschi.
L'arburi si scuzzuleghjanu i branchi tesi versu u fioru giaddu di a spiranza.
Pà'ssi stradioli nisun passu si face senta.
È puru tuttu ci pare cusì vivu, in fatti centini di capuchji culuriti s'alzanu
versu un celu chjaru di libertà, sbattendu à traversu li staghjoni i so cullarini.
U sonu è l'accendita ùn li spaventani.
In a tarra amata sò arradicati pà u sempri.
È sè qualchì volta un aciddonu neru scunvolga la vita ghjè pà rivendica ghjustizia è libertà.
Issa biddezza nuanzata di stragi riflette a storia di u populu chè eddi pugnanu di suffuca.
Com'è un focu chì rende l'anima ci vole à attizza i sensi.
Da li monti à li piaghji, com'è un mughju prufondu scutu da l'infinitu cresce lu to nomu:
libertà !
Un ventu di verità soffia nant'à a tarra.
Cantu veru è prufondu, chì faci drizza u pelu è ci strigni lu cori, c'unisci pà sempri.
Senti la nostra patria chì trema sott'à i pedi.
A MIO MUNTAGNA
Aghju betu lu to fiatu
Muntagna di a sperenza
Cù lu mio cantu pregatu
Pegnu di la mio credenza.
Aghju allisciatu li to chjassi
Abbracciatu li to capelli
Santificati li mio passi
Locu d'amore cusì belli.
Aghju pientu lu to pientu
Di passione rivultatu
Suffertu lu to turmentu
Di a to carne sò impastatu.
Aghju betu lu to fiatu
Muntagna di a sperenza
Cù lu mio cantu pregatu
Pegnu di la mio credenza.
Di u nostru ceppu sì l'agrottu
Quandu dumane pesa lu ventu
Per lu mio populu sempre in lottu
Sia d'amore mai spentu.
​
​
