Tavagna canta Malcolm Bothwell
NUNDA
Nunda ! ùn si passa nunda,
Femu a festa à Santu Nunda !
Pesciu, carne è frittelle,
Frutta, vinu è zitelle,
Musica è muvimentu,
Ch'ellu soffii ogni ventu.
È cantemu in l'onore
Di lu sgiò Guvernadore.
Nunda ! ùn si passa nunda,
Femu a festa à Santu Nunda !
A sposa si n'hè scappata,
A chjappu per a falata
U prete li corre appressu
È ottene un bon'successu.
U maritu hè curnutu,
È ferma cum'è imbutu.
Nunda ! ùn si passa nunda,
Femu a festa à Santu Nunda !
Ballemu la trebisonda
Sopr'à a terra è sopr'à l'onda
Femu focu à Santa Barba
È manghjemu a torta d'erba
I culi ùn ponu frustà
Cusì la donna pò pusà !
Nunda ! ùn si passa nunda,
Femu a festa à Santu Nunda !
PIÙ N'ÙN SI SÀ
Più n'ùn si sà chì hà ragiò
L'omu stà sempre in prigiò.
Ùn vale à sturciculà
Solu a morte hè verità.
Oghje ti ci vole à cappià
Soldi, roba è benestà.
Prega puru lu Signore
Chì prestu sò conte l'ore.
À MEZU À TAMANTA GUERRA
À mezu à tamanta guerra
L'omu riesce à triunfà.
A vittoria hè cum'è a terra
Innacquata chì vole dà.
À tutti ricchezze è vita,
Bellu fruttu amaturitu,
Dopu la pena finita
È lu sforzu riferitu.
Cum'è u corpu di la donna
Sottu a pioggia di l'amore
Chì spannata, ricca è bona
Sale in gloria è in onore,
A vittoria hè un cantu
À l'assaltu di u cele
Di a fiduccia hè l'incantu
Hè u latte è u mele.
Simu ghjunti à lu mumentu
Per un scoppiu di verità.
Ùn ci hè nisun'turmentu
È nemenu felicità
Chì conti, quandu la vita
Si ne vole trapassà.
Questa hè la gran'ferita
S'è l'amore ci vole à cappià
Pocu face lu ripentu,
U mumentu hè per passà
Ogni amore hà lu so tempu
È ùn vale à pattighjà.
U SILENZIU
U silenziu gocce à gocce
S'empie tuttu u mondu interu
Cercu à sente una voce
O almenu un penseru
Ma nisunu ùn mi risponde
Stò scunsulata per ste sponde.
Oghje corre a risa scema
Scaccanime di la morte
Ditemi cosa ci ferma
Per pudè cambià la sorte
Avà sì chì ghjè l'invernu
Ferà fretu ab eternu.
L'OMU SEGUITA
L'Omu seguita l'Idea
A piglia per una dea
È daretu vole corre,
Poi si scanta di l'amore.
Ma si ne stà chjuculellu,
Piatta un core di zitellu,
È la Donna hà l'onore
Di vulè salvà l'amore.
HEC EST DIES
Hec est Dies quam fecit Dóminus :
exsultémus et letémur in ea.
Confitémini Dómino quóniam bonus :
quóniam in sæculum misericórdia ejus.
Dicat nunc Israël quóniam bonus :
quóniam in sæculum misericórdia ejus.
Dicant nunc domus Aaron :
quóniam in sæculum misericórdia ejus.
Dicant nunc qui timet Dóminum :
quóniam in sæculum misericórdia ejus.
U LEVANTE SCATENATU
U levante scatenatu
Trattendu fermu l'imbastu,
Senza tema u marosu
In Corsica ci hà purtatu.
Stata hè vulintà di Diu
È di Cristu furtunatu.
U culombu hà intrunatu
U rughjone ammutulitu,
U so sonu hà ribumbatu
Sveghjendu ogni partitu,
Ancu a mufra impaurita
Apri l'ochji intramanita.
Ch'ellu sia benedettu
L'annu ottucentu è trè,
Quandu Leoni « u Strettu »
Papa vulendu esse rè,
D'ordini in carta bullata
Santa avia fattu l'armata.
Maiò era la scumissa
Contru u Moru sarracinu,
Di ripiglià a so terra
Mandendu lu palatinu,
Carcu di croci è di fede
È cù u bracciu à cavalcinu.
Oghje semu in terra corsa
Pè curà ogni ferita,
È renda à questu paese
U veru sensu di a vita
Chì ùn pò avè valore
Smintichendu lu Signore.
GUERRA
Pè l'onore di la chjesa
È quellu di Carlumagna,
Pè l'amor'di la famiglia
Chì di morte ùn si lagna,
Oghje di la nostra gloria
Deve firmà la memoria.
Guerra, guerra,
Guerra à Macomettu !
Guerra, guerra,
Guerra à Macomettu,
In stu ghjornu, in stu ghjornu benedettu !
Saiettemu li arceri
Cù li nostri armi murtali,
Ammazzemu li stranieri
In un nivulu di strali,
È chì pichji li più forti
Strazienu lu generali !
Pigliemu lu prestu a vita
Straccenduli lu so corpu,
È chì spada in la ferita
Mai ùn si fermi di colpu,
Ch'ella li crepi lu core
Attizzendu lu dulore !
Pè macellu sarracinu
Ùn siamu fiacchi è lenti,
Quand'elli sò frusti l'armi
I ruderemu di denti,
Sola hè piova di sangue
Chì ci pò rende cuntenti !
QUANT'ELLA N'HÈ MORTA GHJENTE
Quant'ella n'hè morta ghjente
À fiore di ghjuventù,
Quant'ellu si hè spartu sangue,
"Ancu a terra ùn beie più ;"
À vede questu macellu
Singhjozza ancu l'acellu.
Unu hè tagliatu in trè pezzi
È l'altru ferma squarciatu,
Tutti uniti pè l'onore
D'esse morti in sindicatu
Quellu chì hà pocu fiatu
È qualchè filu di vita,
Fideghja à ochju stupitu
Ogni salmu cutrulitu,
È dumanda à lu Signore
Di guarrisce u so dulore.
Ma chì vittoria pò esse
Quandu a croce è u torchju
S'intreccianu pè truvà
U cannicciu pè alloghju ?
Oghje ch'ella pienghji mamma
Pè man'di sciabulatore
È si raspa la spusata,
"Sò stagione di dulore ;"
Pè l'anima d'issi morti
Ùn spulemu malamorti.
Ripigliemu lu discorsu
Femula pè carità
Cambiemu duie parolle
È a stizza sciupperà
À « Amme è cusì sia »
Risponderaghju « Inch'Allah ».
CHJAMA À GABRIELLU
Sì Diu hè d'accunsentu
Ch'ellu mandi à Gabriellu
Messageru alluminatu
Pè a luce di u Vangelu
Vogliu sente u so discorsu
Cù u spiritu di zitellu.
NANT'À ISSA TERRA CURSINA
Nant'à issa terra cursina
Oghje à dolce bagnata,
Lascià vò sbuccià la vita
È a pace tantu amata,
Quì Cristu si n'hè vultatu
Pè a manu di l'armata,
Quì Cristu si n'hè vultatu
Pè a manu di l'armata !
Incumincerà dumane
Un veru ordine nuvellu,
È ci camperanu chieti
A veduva è l'urfanellu.
Noi feremu di issa terra
Di lu mondu lu ghjuvellu,
Noi feremu di issa terra
Di lu mondu lu ghjuvellu !
A TRAGEDIA
A tragedia hè cuccagna
Per rè, principi è signori
Sò turmenti è sò lagni
D'omi soli sò terrori,
Angosce è penseri pagni
Ricamati à fili d'oru.
A nostra vita hè macagna
Senza gloria, senza onori
Ogni stonda, ogni catagnu
Trà lu nasce è lu more
Mancu ci porghje guadagnu
Chì campemu per ùn more.
HÈ GHJUNTA L'ORA TURCHINA
Hè ghjunta l'ora turchina
Chì annanna a passione
A furtuna si rinchjina
È saluta a nostra unione
Hè l'ora di u spusaliziu
Cusì bellu sacrifiziu.
Ci stringhjeremu a manu
Salleremu u nostru pattu
A memoria di l'anziani
Ci vole vede à l'attu
Senza tremu nè frizzione
Tuttu ci chjama à l'azzione
È po compia a vindetta,
Serà l'ora di riposu
Serà l'ora prediletta
U ghjornu serà festosu
U populu ci hà da fà festa
Teba ùn serà più mesta.
Seraghju la to cumpagna
È tù gran'triunfatore
Di tè più nimu si lagna
Serai u mio imperatore
Accogli a mio prumessa
Quella di una principessa.
IN ISSU TONDU
In issu tondu bellu strettu
Viaghja l'anima impaurita
Nisunu serà prutettu
Quandu a lege si hè incrispita
Ùn ci hè arma nè aggrottu
U destinu hè un fangottu.
U destinu hè fangottu
Creone si n'hè avvistu
U putente hè galiottu
Di catene hè pruvistu
À l'anima facenu strinta
A so vita hè una accinta.
Di spaventu hè una accinta
U fretu li vene à dossu
Anu modu à fà la finta
I rè ghjunghjenu à la fossa
Una spelunca funesta
À chì tomba, à chì arresta !
HÈ SCUPPIATA A VINDETTA
Hè scuppiata a vindetta
Di i Dii immurtali
Creone hè à e strette
L'avvene hè più ch'è fatale
Ùn vale à sbattulà,
A mannaghja hà da falà.
Ma crede sempre à u pudere
À a salvezza di u Statu
Ùn cunnosce altru piacere
Altra fede, altru passatu
Ogni manera vole pruvà
Ma a mannaghja hà da falà.
SÒ STATI TAMANTI SIGNORI
Sò stati tamanti signori
Figlioli di sterpa divina
L'avianu carchi à onori
A so furtuna hè u destinu.
Anu assaltatu a muntagna
Chjamata Olimpu di e Putenze
Si sò risi di a macagna
Chì pesa in capu à a scridenza.
INNÒ
Innò chì ùn aghju ancu varcatu
Di l'inferni u neru fiume
A sorte ùn mi hà risparmiatu
U ghjornu chè negrufume
Ma ne sò calma è tranquilla
A vita parte, a vita sguilla.
Mi aspetta a pace di u riposu
I ricordi l'anni passati
A zitellina, i verdi chjosi
A risa di i nostri antenati
E passighjate in l'ombra pagna
L'aria serena più n'ùn si lagna.
​
​
