esciutu in lu 1976
Sorti en 1976
Liberta
A PALATINA
( Tradiziunale )
​
Cinta è bella la carchera
I battaglioni maiori
Sò falati à corri corri
Lu cuntrastu scuppierà
Da l'imbrogliu furesteru,
Oghje o mai s'escerà.
ripigliu:
Or fate sventulà sta chjoma,
Chi tantu sott'à la soma,
Per cent'anni ùn si hà da stà,
Da lu pughjale à la marina
Cantate la Palatina
È lu piombu salterà.
Per lu Capu Naziunale
Appruntate li truffei
I furdani à sei à sei
Anderanu à tumbulà
È dumane à lu Cunventu
U vulemu incurunà.
ripigliu
Avanti la nostra ghjente
Spunta l'alba è s'avvicina
À la Corsica Regina
Gloria per l'eternità.
ripigliu
SULDATU DI U POPULU VA
( Puesia di Saveriu Valentini )
​
A Corsica tomba iè
Tomba
Ma senza sipultura
In u cimiteriù umanu
Di i cuscenzi luzzinosi
Si sceta
È tremani di paura
I rapaci sanguinosi
È culpevuli
Chi bulani à corpu pienu
Sopra a so agunia
Di i seculi pasati
Chì morta no
A Corsica ùn hè morta
A Corsica maiori
À i porti di l'orienti
A Corsica di l'Eroi
Quidda di a libertà
Di a spiranza scitata...
È u mondu a fighjula...
Da la fumaccia
Pagna
Di a storia addurmitata
Di storia incarciarata.
In i carciari oscuri
Di quidda chi hà vintu
I fucili rughjinosi
Di Corsica rinata
Sortini
Culpiteghjani da veru
In a memoria cumuna
Intricciata
Ma viva
Di u populu chì và
È tirani in Aleria
È tombani in Bastia
È l'unità si faci
Daretu à ogni colpu.
Suldati u populu
A libertà si sà
Costa a vita di l'omu.
U populu minò
Mucatu da e catene
Chì porta in pesu in pesu
Corsica cù finu ad oghji
È dumani sempri
Iè e prighjò si chjudenu
È si chjuderanu dinò
Nantu à curaghju di l'omi
Finu à quandu
Iè finu à quandu
Ma ogni porta chì si chjude
Da u bughju
Centu ne caccia torna
È a me penna s'infiara
A meia a toia
È tante è tante dinù
Com'è a mescia
Chì brusgia
Incesa da a to manu.
ARRITI
( Parolle di Filice Filippi
è Musica tradiziunale)
​
Da quì mughju mane è sera
Da quì pensu notte è ghjornu
Da Corti lampu a chjama
À i corsi di u mondu
Ch'ormai l'ora hè sunata
In Corsica di fà ritornu.
Pruclamu le to sintenze
Senza vulè fà un delittu
Senza mette bassu l'arme
Si ùn aghju u me dirittu,
Prontu à tumbà è prontu à more
Sì cusì a sorte vole.
O scruccone sceleratu
O tù perfidu destinu
M'hai suchjatu lu sangue
M'hai ingrunchjatu lu spinu
Sia d'estate o d'inguernu
In paradisu o infernu.
O fratellu sò invechjatu
È u me core si lagna
Ùn sentu più la to voce
Da San Petrone à la Tavagna
Ne sò tutti imbastarditi
Da la piaghja à la muntagna.
Ch'ellu piovi una cumetta
È distrughje i cannoni
L'omi tutti scapigliati
Senza frisgii nè galloni
I lupi diventani cani
È i sumeri lioni.
Spariscanu li prefetti
Incù la magistratura
Chì l'omi senza curragiu
Ùn abbianu più paura
È à l'entre di l'inguernu
Malamorte à u guvernu.
Un paisanu a notte aspetta
Cù rispettu è emuzione
Senza tremà tardavellu
È caccia mi di e prigione
È a santa libertà
Degna d'un populu maggiore.
U CULUNIALISTU
( Puesia di Marcellu Acquaviva )
À prima intoppu vi pare
Un omu d'altru sapè
Cumpiacente è manirosu
Sempre prontu à fà piacè
Ma pratende amparacci
In casa nostra à stà più bè.
À certuni face imprissione
Cù i soldi è i dannari
S'ell' ùn ne hà per ellu
U statu arrangia l'affari
È li dà tutti avantaghji
Ricusati à nostri pari.
Cunnosce tecnica è pratica
Amparete à l'alte scole
In Corsica ùn anu fattu
Chì u guvernu ùn ne vole
È cusì u ghjugniticciu
Hè grand'omu è noi bistiole.
S'ellu sente parlà corsu
Appinza tandu u musu
Quessu hè faccende anziane
Ci vole à perdenu l'usu.
Hè quant'hà vulè fà panni
Aduprendu rocca è fusu.
S'omu canta una paghjella
Ne diventa infribbacciatu,
Cambia prestu di culore,
Di u so sangue hè spuzzatu
O quantu li face male
U nostru vechju passatu.
Ùn c'hè populu nè nazione
Ch'ùn sia di u so paese
È ciò ch'ellu vene à dì
Puntilleghja e so imprese
Sà ancu pinsà per noi
L'altre idee sò difese.
Ma ùn sà micca chì quì
Nimu hà pudutu impone
Sintimi o fatti cuntrari
À u spiritu di u rughjone
Solu accittemu da ellu
Un attu di cuntrizzione.
Si purrà chjamà sudesfu
U corsu ristatu fieru
Quellu ch'ùn hà betu
Acqua torbia à u bichjeru
Chì li porghje à manu in pettu,
U barbantone stranieru.
A RIVOLTA
( Parolle è Musica di ghjuvanpaulu Poletti )
O fratellu, o fratellu,
Sò sbarcati versu sera,
Cù li cavalli di ferru
Facenu trimà la terra
U rinforzu di i fucili
È cù la tenuta nera.
Ùn sentite per le muntagne
Le muvre sò accampate
In lu celu bughjicosu
E stelle si sò piattate
E mamme à lu fucone
Di neru sò ammantate.
ripigliu:
Cantanu i patriotti
Nant'à i chjassi di a storia
Cantanu la patria amata
È la so santa memoria.
O fratellu, o fratellu,
S'hè piattatu lu scruccone,
Hà paura u deputatu
Ùn averà più buccone,
Marchja u populu rittu,
In casa di u latrone.
E catene sò strappate,
Pronta hè la to carchera
E campane ind'i paesi
Sonanu à sbattagliera
Per la pace, per l'avvene
È per la santa bandera.
Cantanu i patriotti
Nant'à i chjassi di a storia
Cantanu la patria amata
È la so santa memoria.
ripigliu:
CHJAMA PER U ZITELLU
( Puesia )
Zitellu, mi sò svigliatu stamane
Ti portu un messaghju di pace
Accant'à mè canta a nanna
Canta a nanna di populu
L'acellu chì canta
Hè un simbulu di l'avvene
Portami vicinu à tè
È inseme faremu a strada di a pace.
U MUVRINU
( Parolle è Musica di Ghjuvanteramu Rocchi )
Di le so prove
Sentu sempre lu vantu
Sò ghjunti à schere
È fattuli l'accampu
S'anu chjappu lu muvrinu
Chì ci teniamu tantu
Po lu si n'anu falatu
per purtassilu in un lampu.
Rizzati o caru
U muvrinu arrivintu
Imbela in la strada
Chì colla in Monte Cintu
Brama di ghjucacci torna
Induve lu lacciu l'hà vintu
L'anu messu le pastoghje
E lampatu in un accintu.
Quassù la muvra
Sola la curciarella
Tutta la notte
À chjamà si scannella
Teme di vedela spenta
In celu l'ultima stella
Senza chì lu so muvrinu
Sia torna à cantu à ella.
Da casamazza
È sempre in lattu à Golu
Falli l'avviu
Sin'à lu Ponte Novu
È po dopu fratta fratta
Sinu à lu biancu Niolu
Quantu seranu cuntenti
È la mamma è lu figliolu.
Rizzati o caru
Aiò rittu chi hè ora
Tè la mio manu
Escimu inseme è fora
T'accumpagnerà Babbone
Chì tù ùn abbia paura
Di fà cappià lu muvrinu
Serà la nostra primura.
SUNATE LU CORNU
( Parolle di Don petru De Mari
è Musica Tradiziunale )
Aiò! tutti i fratelli chì hè l'ora
D'armà schjoppi è di cigne carchera,
Da lu monte à lu fiume à la serra
Chì lu cornu ripigli à sunà.
Ripigliu:
Sunate hè lu cornu
Ùn ci hè più riscattu
À populu fattu
Bisogna à marchjà.
In lu cornu risona la voce
Di Sampieru è di l'altri guerrieri
Chì per vive liberi è fieri
O per more, curagiu ci dà.
Ripigliù:
Aiò ! tutti ! fratelli chì hè l'ora
Di cessà frà noi altri ste lite,
Ci emu fattu abbastanza ferite,
N'anu risu abbastanza culà.
Ripigliù:
Stintinati ci semu abbastanza
À l'azzizzu d'un vile nimicu,
Tocca ad elli per ghjustu castigu
À purtanne lu dolu è trimà.
Ripigliù:
Aiò ! tutti ! fratelli chì hè l'ora
Di stirpà sta razza maladetta
Grida in celu, per noi vindetta
Tantu sangue è tanta infedeltà.
Ripigliù:
Un vidite ste donne ammantate ?
Un sentite di Baziu lu Vechju,
Cirnu, d'elli, un spavechju ferà.
Tutti sottu à listèssa bandera
Bianca, ornata di la testa Mora,
Aiò Corsi chì turnata hè l'ora,
Di l'antica nostra libertà.
Ripigliù:
SIMU SBANDITI
( Parolle di Ghjuvanteramu Rocchi
è Musica Tradiziunale)
​
Simu sbanditi,
O pessima cunghjura
Chì sò dui seculi ch'ella dura,
C'hè stata tantu aduprata
La so trista punghjitura
Quandu impiegata la forza,
Quandu la intrappulatura.
Da Ponte Novu,
Finitu lu tazzeghju
Ci si sò dati à fanne assai peghju,
Viulentendu è impicchendu
Induv'ellu c'era passeghju
Di u populu di Cirnu,
Chì ancu oghje n'hà lu schifeghju.
Per fà le so guerre,
È fà lu so imperu,
S'anu arrubbatu più di u bracciu fieru,
Ramintendusi le prove,
Di Ghjudice è di Sampieru,
È di Sambucucciu d'Alandu,
È di Paoli l'altieru.
Sò senza bande,
Li nostri li pastori,
È senza terra sò tanti agricultori,
Fora la giuventù corsa,
Stà fendu lu corri corri,
Quand'elli sbarcanu à schere,
Li soi l'incettatori.
Micca banditi,
Patriotti d'onore,
È per la patria pronti à lu furrore,
E nostre bandere bianche,
Stampate di teste more,
Chjoccanu cum'è saette,
In faccia à l'ingannatore.
Aiò surelle,
Aiutate à la mossa,
Vi guidi sempre Faustina la corsa,
Chì lu populu di Cirnu,
Mai lu metteranu in fossa,
Sè cun voi per cumpagne,
Demu oghje l'ultima scossa.
O l'arme eterne,
D'ogni virtù pruvisti,
Femu spazzosa di tanti inghjusti acquisti,
Ch'ellu si ne parla à veghja,
Quì di li culunialisti,
O li ladri o li furdani,
O li cani fora pristi.
LETTERA DI U PRIGIUNERU
( Parolle è Musica di ghjuvanpaulu Poletti )
Da u fondu di e prigione induve tù sì,
Dimmi ciò chè tù pensi,
Dimmi ciò chè tù brami...
Vogliu cantà le to muntagne immaculate
Quandu l'alba santa si disceta in mè,
In lu to celu ci cantanu le fate,
È tante voce pure si spannanu cun tè.
Vogliu cantà cum'è un figliolu curagiosu,
In terra nemica oghje incarceratu,
Cun tanta cura u destinu gluriosu.
M'hà purtatu cun fede à l'altare sacrate.
Ripigliu:
Dammi la forza per tene alta la to bandera,
È libertà per la to terra cusì fiera.
Vogliu cantà li to oddii, le to passione,
Quandu mughja in mente u ventu nustrale,
Chì ghjunghje è sbatte e porte di e prigione,
È chì l'eterna gloria alza lu so fanale.
Vogliu cantà cun quattru muri per cunfine,
Aspettendu l'ora di la verità,
È anderaghju sempre senza fine,
A pace ritruvata per l'eternità.
Dammi la forza per tene alta la to bandera,
È libertà per la to terra cusì fiera.
Salute à tè, prigiuneru macchjaghjolu,
Quand'è tù turnerai ùn ci serà più dolu.
ripigliu:
​
​
