Esciutu in lu 2001
Sorti en 2001
L'omi di sta tarra
Sdradichere
Quand'ellu muntagnava
Era l'andatu soiu
E po sappiutu à mente
Chi stellava l'ore
Di e passate chjare
Quandu u celu pare
D'avè truvu u so sogliu
Da tempi è tempi scorsi
Quand'ellu carrizzava
I chjassi pè isse loche
Suminate è curate
Da e mani in faccenda
Mancu una petra ceca
Si francava a cuscenza
D'u so passu sicuru
Per un pugni di granu
Quand'ellu straziava in issi tufoni bughji
E po sapiuti micca chi scannavanu l'ore
Chi e balle è e bombe à l'attrachjate tocche
Tunnavanu è dalli, hà scuntratu a morte
Pè e so strade spente un hè vulsutu corre
L'hà dettu d'aspettà, l'hà dettu chi di core
Sapia d'altre lenze, à lindumani danci
Ma un focu infariatu li hà strappatu l'anche
Oghje duv'anderanu
Senz'un frisgiu di spine
Un tantu di filetta un pucucciu di mane
I camini spugliati di radiche umane...
I camini spugliati di radiche umane...
L'omi Di Sta Tarra
Ne site ghjunti à I' arice
Di stu tempu chi hè fughjitu
U vostru core hè sculpitu
Da millaie di vinice.
So l'ultime stonde piglie
A sta vita tribbulata
A vostra fronte hè sulcata
Da millaie di riviglie.
D'ogni mistieru so fruste
Ormai e vostre mani
Citatini e paisani
Chi da u principiu fuste
L'omi di sta tarra
U vostru sguardu prufondu
Rimireghja u passatu
U seculu s'hà purtatu
Cio chi fu u vostru mondu.
Sottu à u pesu di l'anni
S'aghjumpa u vostru spinu
Un'ombra vene vicinu
vistuta, di negri panni ...
Site à locu di riposu
E piu nun vale à pricà
Sta mane vecu spuntà
Un albore luminosu,
Pè l'omi di sta tarra.
Boston Rose
Falanu l'ultime fronde
E ne coprenu u chjassu
Chi porta i zitelli sin'à I'ore di scola
A me vita si ne ferma
Una spina à mezu cori
Quandu d' ella mi ramentu
Un'ochjata cara
I ghjorni passati inseme
E isse stelle ricuarate
Ma lu tempu trà di noi
Hà fattu u so dannu.
L'aghju vista un ghjornu d'onda
E di ventu addurmintatu
E di colpu u sguardu meiu
S'hè innamuratu ...
Ripigliu
A : A truvà ci in issi dumani
S'ellu ci torna à ligà
Un passu di vita, una risa in cima
Un'imseme à ricummincià
A truvà ci in issi dumani
S'ellu ci veni à circà
L'amore fughjitu per purtà ci più in là.
l'aghju intesa un'ora d'alba
Issa canzona d'u me pettu
E tù sempri rispiravi u to sonnu chetu
E ci hà spiccatu a vita
E chi t'avarà purtatu
Di poi chè t'ùn se piu qui à lu me latu?
E lu ghjornu mancu spentu
S'hè appesu à lu to nomu
A qualchi passu a l'avventu d'un pinseru colmu
venenu l'ultime stonde
Di sta sera chi s'agguatta
E di colpu u sguardu meiu s'hè annivulatu ...
Ripigliu A:
E mezu à ste fronde mosse
Da i venti di l'invernu
Ferma un ricordu d'amore urfonellu
E mi senti pianu pianu
Com'è u basgiu d'un rigrettu
Corm'è u to sonnu sfattu di lu me pettu
U silenziu apperlamanu m'invengu d'a to carezza
Ferma la so ombra d'eri
E d'ammarezza.
T'aghju vistu un ghjornu piossu
E issu ventu sempri dormi
E di tè u sguardu meiu
dinô s'innamora ...
A truvà ci in issi dumani
S'ellu ci torna a ligà
Un passu di vita una risa in cima
Un'inseme à ricummincia
A truvà ci in issi dumani
Puru s'ùn ci hè nunda a fà
Ti voddu di ch'u me cori
Mai di tè si scurdarà
Casa D'ors'antone
O casa d'ors'antone,
Casetta di babbone
D'inguernu in la muntagna
senti lu ventu cume si lagna
E di Bastia a la Balagna
Sin'à lu Sartinese
Stu ventu hè lu Muntese.
Si sà ...
Di Sittembre tranquillu
Un si sente piu grillu
Cantava da per tuttu
Ma s'hè firmatu, po zitt'e mutu
Bisogna à dilla à li pinzuti
Ch, per stu silvarecciu
si pesa lu Libecciu.
Chi fa? ...
D'a casa d'Ors'antone
Si dice in lu rughione
T'hà lu so focu spentu
Ci hà suffiatu dentru lu ventu
Cum'è timpesta, quant'è spaventu
Issu ventu furdanu
U chjami tramuntana
O bà!
Parlendu di lu ventu
Numacci po n'hà centu
Ghjè ventu Maistrale
Quellu chi soffia li tempurali
Ma di lu monte à lu fiuminale
A lu lagu di Crenu
Nasce u ventu serenu.
O mà ...
Cuccuruzzu
In Cuccuruzzu tant'anni fà
Ci eranu tandu, qual'hè chi sà
Tutti l'indiani detti I'Inca
E si pregava à Viracocha
Cuccuruzzu aghiu sunniatu
Se tu ti chjamessi cuzcô
Cum'ell'hè longu issu viaghju
Mamma dicia ô, ô, ô
Stà mi vicinu figliolu caru
Guarda lu monte, guarda lu mare
Un s'alluntani u me figliolu
D'issu rughione muntagnolu
Cuccuruzzu u core mi pugne
D'un affannu di un so chè
D'un rigalu ch'è tu mi ghjunghji
Mamma dicia "ohime"
Ognunu tene u so circondu
In ogni parte di lu mondu
L'Omu di Cagna e lu Lione
Di Rocapina un li cunfonda
Canzona Per Un Ghjuvanottu
Qual'hè a vita chi mi manda
Quelli ricordi à palisà mi
U bellu di I'ore passate
U so surrisu pè stu mondu
Sarà a vita fatta à sogni
A ghjorni posti à e sulanne
Un ghjuvanottu face mottu
Forse averà guasi vint'anni
Pè qualchi stracciu di sfurtuna
Laca i soi à l'abbrucata
Sta notte i pienti di a lune
Dicenu l'ore singhjuzzata
Duv'anu chjappu e stonde scritte
A li so gesti è le so chjame
Dopu sguassati in un'amme
Quandu venute e stonde afflitte
Qual'hè a vita chi mi dice
U sguardu dolce d'u so visu
L'andà d'u so passu dicisu
A ghjuventù è L'amicizia
Sarà a vita fatte à canti
A voci messi pè isse notte
A ghjente chi parlanu forte
A mani strinti per un tantu
Sarà la fiara d'u so core
Chi ferma pè li so più cari
U lume biondu d'un amore
Chi u s'abbraccia pianu pianu ...
Pà Olivier
Solitudine
Solitariu in sta campagne
A mè l'angoscia mi rode
O quant'elle stanu male
Queste ghjentarelle sole
Un aghju per cumpagnia
Chè qualchi spira di sole.
Chè ne battu lu rughionu
Facenu vinti dui anni
Qui ci stantu lu mio pane
E cun gioia è cun affanni
E mi piace lu mio locu
A borga di San Giuvanni.
Bellu spessu ci cuntemplu
A l'inchjerchi le so cime
M'incanta tuttu lu ghjornu
Di I'acelli u chjuchjulime
Eiu per passa lu tempu
Ne cumpongu duie rime.
Quand'ella vene la notte
A'mè m'abbughja lu core
Dumandu pace è salute
Cun la grazia d'u Signore
Casta cum'è Santu Petru
Pianu si spegne è si more.
Cogli Lu Ghjornu
A frombu battutu lu tempu trascorre
E strughje e sperenze di a mo'giuventu
A sfiera celesta nun face rimore
Ma stonda brusgiata un risorge ma'piu
Da sopra lu monte ci sprichja un bagliore
Un ragiu di sole innora la volta
Rinasce Veranu è sbuccia lu fiore
E canta la vita a voce rivolta
Rispira l'azuru giuventu fiurita
E cogli lu ghjornu mentre si frischetta
A vechjaia solca prufonda ferita
Falcina impustata ci tende l'anchetta.
Ripigliu :
O bella zitella accendi I'amore
E godi la stonda senza pate I'asgiu
Attizza a passione à sparghji calore
Sumena la gioia è spula lu basgiu.
Carina
Andemu a vede, carina
A rosa chi sta matina
A l'albore hà surrisu,
S'ella hà sempre u so vestitu
Di purpura culuritu
Cum'è lu to dolce visu
Ohimè! sorte mischina
In pocu spaziu, carina,
Sopra piazza s'hè sfugliata.
O chi matrigna nature
Postu ch'un tal'fior'un dura
Che da I'alba à l'attrechiata
Dunque, credimi carina
Mentre la to zitellina
Si sbucina cun dulcezza
Cogli, cogli a to giuventu,
cum è stu fiore ancu tù
Perderai a to bellezza .
U Catagnonu
In chera à nantu'una scarpiccia,
Si trova lu me catagnonu
Fattu in petr'accudditicci
Da la mammon'di babbonu
Una porta è un balconu,
La mubiglia, un panconu.
Zuddu frustu è calcicatu,
Tistimoniu in a porta,
E nu so tempu passatu
Quantu n'hà vistu entr'è sorta
Hà vistu entri lu pilonu,
Oghji roda strett'è corta.
Saraghju un pocu di bonu,
Diciareti chè mi sbagliu
Quandi ghjè pensu à babbonu,
A lu so duru travagliu
Pà lu chateau di Versailles
U To Primu Affaca
U to primu affacà
Fù mazzulu d'amore
U sangue in lu mio core
Si messe à cianguttà
Sintiu à stu mumentu,
Oghje a ti palesu
Chi l'amore era incesu
In lu mio core spentu.
A mio voce fu muta
Tacitu u mio sguardu
Ma feciu da buciardu
Chjappu à l'aspinuta
Cum'è un sonniu svanitu,
Tù mi lasciasti in brama
Quant'è chi a to chjama
Aspittessi u mio invitu.
Oghie sciogliu e vele
Di u mio sunnià
E mi lasciu purtà
A l'asgiu di u mio crede ...
E a luna falcata
A u sonniu risponde,
Sussurendu mi stonde
Di a nostra abbracciata.
U to primu affaccà
Fece pianta ogni sfiera
E da tè prigiunera
L'anima meia sà
Chi issu ghjornu sulcatu
Nù u corsu di l'ore,
Fusti tù u mio fiatu
E u mio batticore .
L'anneddu
Ti ni ramenti, o cara, di u beddu mumentu
Quandu di tè mi so innamuratu
Maraviddosu è beatu passatu
Viotu di nustalgia è di turmentu ...
Tù eri par mè un fioru à mezu à i fiora
Fors'anch'eiu par tè ùn'era senz'attichju
E di u me cori ascultaia u pichju
Chi pà i to bedd'ochja sbattuzzaia à tutt'ora!
Ti possu di, o cara, ch'eiu mi ramentu à spissu
Di issu mumentu chi mi pari arrimani
Di a noscia prima strinta di mani
E di l'amor'eternu da tutt'è dui prumissu
Quandu di a noscia ghjesia funi aparti i porti
Fubbimu assaltati di rosi è di risu
Tù, ringraziendu à tutti d'un surrisu
D'amori, mi strinsi u bracciu ancu più forti!
Da poi capu è capu in quissa longa vita
I nosci capiddi scuri si so mischjati
Po pianu pianu si so ingrisgiati
Com'è si n'he ingrisgiata a ghjuventù sparita
A nant'à i ritratti oramai ingiadditi
A sera, si di li volti, ci ni stemu a veghja
Una lagrima chi ci impidisci di leghja
Ni veni à bagnà i surrisi svaniti. ..
Avà à u vaghjimu di a vita
E chi à tutt'è dui ci si piega u bustu
Cuntemplu in suttu u to anneddu frustu
e po d'una carezza l'allisciu d'i me dita!
U Pinu Di Palumbaghja
In a rena d' arghientu chi li faci curona
E chi u mari turchinu veni à carizza
Stracquatu pà l'eternu senza cantu nè sona
Un pinu maestosu finisci di mirzà!
Eiu l'aghiu cunnisciutu in a me zitiddina
Quandu sgueltru,a mani,andaia à caccighjà
A metta un cupponu,à pona una tindina
Chi tandu à a bulama li piacia à calà ...
Po quantu volti in Pasqua à nosciu usu fideli
Sutt'à a so ombra zippa s'andaia à fistighjà
Ni stindia par no' i so braccia in'u celi
Come si di a malora ci vulissi parà!
M'hà vistu d'istatina circa a so friscura
In u pienu calori, vultendu di piscà
Era un veru fanali, un boscu di virdura
Ancu da l'altu mari si facia bramà.
Oghji un s'ammenta più u Pin'di Palumbaghja
L'omu chi l'hà traditu ormai u pô franca
Si ni ridara in suttu a ghjilosa lamaghja
Di vedalu à so paru ben fiera ni sarà !
So ghjunti d'altri ghjenti a pidiatà stu locu
Senza pisa u capu pa vedalu intrunnà
So ghjunti d'altri mani ad accenda u focu
Senza pocu primura di vedalu piccià ...
Un s'ammintarà più, u Pin'di Palumbaghia
Chi fieru e maestosu ni mirava a Sardegna
Di vedalu sticchitu è siccu à mez'a spiaghia
Mi si stringhji u cori è da laziu di pienghja!
​
​
