Canzone Corse

A BALLATA DI MATTEA

 

Ùn lu vidarei più u capu à a falcunaghja 
I culombi chì d'aprile volanu sempre per paghju.

 

Ùn farei più sunate à u sole di e murnaghje 
Ne puru ti sintaremu impruvisà nant'à l'aghja.

 

D'ottobre in campu furnellu quandu sarà la stagione 
E giuvanotte à cugliera aspitteranu e to canzone.

 

Piengu di sapè chì di marzu quandi u sole hè più vivu 
Ùn sarei più cù noi sott'à i rutoni d'alive.

 

Quandu pensu à li to ochji u mio ciarbellu si move 
E piengu li mio suspiri mentre corre l'oliu novu.

 

M'avii tantu prumessu d'esse sempre à lu mio latu 
Ma quandu ùn t'aghju vistu ghjunghje, si n'hè struttu lu mio fiatu.

 

Megliu ch'ùn ci pensi più chì a mio memoria scrochja 
Morgu pianu di sapè chè t'hai sceltu d'altri ochji.

 

Oghje dapoi tanti anni ormai a to strada hè meia 
Di scopre tante billezze da e cime di San Parteu.

 

À CUNNOSCI L'ETÀ

​

Di tanti suspiri è stonde 
Troppu ghjorni so per mè 
Stessi à l'onda calma chì corre in tè 

 

Tante parolle crisciute 
À l'avvene chè t'ùn sai 
Da purtà e nostre voce sin'à mai.

 

Dopu sarà l'invernu cù e so file d'infernu 
Voga puru una stagione chì po fà 
Di pettu à u sempre chì và.

 

Cum'è un fanale d'oru accesu 
Sguardu passi cusì à l'ora più cheta 
Di a mio vita chì corre quì 

 

Dolce mumentu sicretu 
Veni tù subit'avà ghjunghji è stancia 
A mo sete per campà.

 

Dopu sarà l'invernu cù e so file d'infernu 
Voga puru una stagione chì po fà 
Di pettu à u sempre chì và.

 

Sai sò l'anni in giru à noi 
À puntillà ogni certezza 
À alliscià i nostri sensi cù a so carezza 

 

Si sbuccianu i mo fiori 
Senza mancu troppu sapè 
U mo corpu trema di vita per tè.

 

Tandu sarà l'estate cù e so file infiarate 
Voga puru una stagione per noi farà 
Di pett'à u nostru sempre chì và.

 

BALLU DI RIME

 

Puesia chì m'aiuti 
Sè sò tristu o innamuratu 
Quandu scappu pè li prati 
È chì a mio mente hè muta.

 

Riturnella chì mi piace 
Quandu fughje lu mio core 
È ch'elle scappanu l'ore 
Sì a mio voce si tace.

 

Bella muvra chì mi basgi 
Quandu battu a muntagna 
A to corsa m'accumpagna 
Quandi u mio estru hà l'asgiu.

 

Paesi di centu stagione 
Foscu o chjaru pè i mesi 
Sott'à i castagnoni appesi 
Oghje mughj'a to ragione.

 

Boscu verde à u veranu 
Quandu sbuccianu li fiori 
Chì a chjama di l'amore 
Rallegra u core umanu.

 

Zitelletta di a notte 
A to strinta hè innariulata 
Nant'à a mio terra amata 
A to chjama hè rivolta.

 

CANZONA PER LAURA

 

Era eiu'ssu zitellu 
Di e mane nivaghjone 
Marchjava nant'à lu stradone 
À latu à u mio fratellu.

 

Era eiu'ssu zitellu 
Di a corte di e scole 
Di e seratiche fole 
L'ochji persi ind'è e stelle.

 

Era eiu'ssu zitellu 
Di l'ore più partimpine 
À a chjama di u mio cucinu 
Per andà apress'à l'agnelli.

 

Era eiu'ssu zitellu 
Vechju cum'è a natura 
Saziu di e to primure 
U core appes'à'ssu cantellu.

 

Era eiu'ssu zitellu 
Mà in l'ochju d'una ciuccia 
Oghje sò quellu zitellu 
Oghje sò quellu zitellu.

 

IN LU NOVU CAMPÀ

Scrive nant'à l'ale di u ventu 
E parolle sumente 
Di lu novu campà.

 

Scrive nant'à l'acque ridente 
U sfocu senza pientu 
Di lu novu campà.

 

Scrive nant'à i corpi di a fame 
E parolle dulente 
Di l'anticu campà.

 

Scrive nant'à e facce di sole 
U ballu senza fine 
Di u novu campà.

 

Scrive nant'à i passi di fole 
U ballu senza fine 
Di u novu campà.

 

Scrive ùn ci serà più pena 
Ne più fogliu pè scrive 
Attì da cundannà.

 

Mai a sumena sumena 
No sentimu pè scrive 
A voce di ognunu 
In lu novu campà.

 

L'ALTU PRATU

 

Quassù nantu à l'altu pratu 
Trinca u son d'un viulinu 
Volta è gira a ronda zitellina.

 

A notte sottu à e stelle 
A ghitara pè cuscinu 
Accumpagni u cantu di e spiscine.

 

Pè e strade di u mondu 
Canterinu hè u to versu 
Chì a to voce move l'universu.

 

Cumpagnu girandulone 
Fratellu di e mio fame 
Di cantà tutt'ognunu hè in brama.

 

Si a spessu s'infelice 
Cercali bè i to pari 
Anu in core u là di a ghitara.

 

È si puru di cantà 
Ùn cunnosce l'armunia 
Fà una strinta d'ochju a puesia.

 

Ùn ti scurdà d'issa mossa 
Chì t'hà purtatu oghje quì 
À tutti cantali puru cusì.

PER TÈ

Quantu n'avemu fattu passi è ghjucate inseme 
Cun tettu di filetta per unica furtuna 
È tanti mondi novi avemu sunniatu 
E sere d'allegria à l'ochju di a luna.

 

Tanti panni stracciati è camisge di fora 
I ghjorni di rivolta di guerra zitellina 
È tante corse vanne vive è spatansciulate 
Pè lu matticciu rossu di tagliu cristalinu.

 

Tantu calore umanu sparghjia le so ale 
Quandi u sgiò inguernu truncava i ghjamboni 
Chì pè e strade bianche u vechjone natale 
À li fuconi accesi lintava e canzone.

 

È po li primi passi quandi u tempu fughje 
È le prime angoscie tinte da lu veranu 
Mi davi a to bocca è u to primu mughju 
È cù lu to furrore stringhji la mio manu.

 

Pò sò passati l'anni è si sò scorse l'ore 
Cum'era u to nome.

 

PER UN PASSU DI VITA

 

Sò natu à tempu à tè 
Vechjacciu agrunchjatu 
U tempu c'hà sfilatu trà l'anche 
Cum'è un ghjattu scemu 
Campu cum'è tè.

 

Sò natu à tempu à tè 
Vechjacciu calpighjatu 
U tempu c'hà sfilatu trà l'anche 
Cum'è un ghjattu scemu 
Straziu cum'è tè.

 

Sò natu à tempu à tè 
Vechjacciu sculuritu 
U tempu c'hà sfilatu trà l'anche 
Cum'è un ghjattu scemu 
Morgu cum'è tè.

 

Vechjacciu senz'età 
Simu à listessu puntu.

 

SOLE DI VITA

 

Sole chì nasce in lu veranu 
Aghju decisu un ghjornu d'ascultà a natura 
Sole chì nasce in lu veranu 
È sò partutu solu senza nisun'primura 

 

Dipoi aghju marchjatu senza perdene fiatu 
Per'ssi monti felici a cità s'hè passata 
Furtuna di tant'anni ne vegu l'attrachjata.

 

Sole chì nasce in lu mio core 
Trà l'abbracce bagnate spunta u primu fiore 
Sole chì nasce in lu mio core 
Hè cusì bellu è dolce in st'alba d'esse vivu 

 

Ma da la mio muntagna sentu cullà a chjama 
D'un zitellu chì pienghje signosu di spaventu 
Lacrime di nuscenza affanu in lu ventu.

 

Vita chì nasce in lu mio core 
Oghje mi core in giru è ghjè lu mio figliolu 
Vita rinasce in lu mio core 
Schjarisce la mio strada riscaldu lu m'amore 

 

L'insignaraghju à vive per'ùn esse più solu 
L'orfanellu chì pienghje sarrà lu so figliolu 
U ghjornu di a mio notte purterà u mio dolu.

 

U CONTRARILOGIU

 

U tempu di pisà u mio contrarilogiu 
À l'asgiu di i mei è di l'impaghjellate 
U tempu di ride à lu sole d'estate 
Cù l'acqua primaticcia è di beie inseme, 
È di beie inseme.

 

U tempu di scrive à strappà da sti muri 
Una stonda preziosa à stentu di i mio anni 
U tempu d'intigne e mio labbre à l'amore 
À lu tempu di tè è di fanne una stonda, 
È di fanne una stonda.

 

È lu soffiu di u tempu nantu à le to labbre 
C'attunderà li ghjorni sin'à l'eternità 
È lu soffiu di u tempu nantu à le to labbre 
C'attunderà li ghjorni sin'à l'eternità, 
Sin'à l'eternità.

 

U PESU DI L'ORE

 

Cunnoscu di i ghjorni 
U soffiu calore di l'ora d'amore 
U sguardu è l'asgiu di l'ora basgiu 
U basgiu divizia di l'ora amicizia 
L'abracciu accolta di l'ora rivolta.

 

Cunnoscu di i ghjorni 
A mossa spera di l'ora sfruntiera 
U farru suffrenza di l'ora sperenza 
U visu spentu di l'ora tempu 
U tempu stonda di l'ora mondu.

 

Cunniscimu i venti è l'ore angusciose 
Nate à i primi tempi dipoi chè no simu 
È mani tese in'un sbuccià sicretu 
D'un idea chì move à u sguardu malatu 
Donne omi negri è bianchi 
Chì strada serà dumane

​

​