esciutu in lu 1989
Sorti en 1989
Guerrieri di l'Eternu
CARNAVAL
Estiu sen grana
Feda sen lama
An car sens sen carnaval
Molin sens ala porta barrada
Taula sens vin torna venir.
N'avian dit que t'ères anat
Al paîs d'ont se torna pas
Entre la mar de l'amargant
E las planas del pas res mai.
Estiu sen grana
Feda sen lama
An car sens sen carnaval
Molin sens ala porta barrada
Taula sens vin torna venir.
M'avian dit que t'éres perdut
Dins las brumbas del pas nascut
Al ras de mortas esperanças
Del costat de la desbrembança.
Estiu sen grana
Feda sen lama
An car sens sen carnaval
Molin sens ala porta barrada
Taula sens vin torna venir.
E segur qu'avias cabuçat
Cambas e braces barrejats
Al cambat de las bocas mudas
Paîs clavat, terras vendudas !
Estiu sen grana
Feda sen lama
An car sens sen carnaval
Molin sens ala porta barrada
Taula sens vin torna venir.
CHJERCHJU
Mi sente a vita d'ùn la pudè sente
Sole scuru cum'è lu misteru
Doppia incapiscitura fungu di mente
Mi ne vog'à lampà mi ind'è lu pozzu neru.
Mi ne vog'annigà mi indè l'alti sapè
Mai scritti, mai detti sell'ùn fuss'una volta
Quandu Diu creò pè l'altri cum'è per mè
D'una parolla sola u fondu è a volta.
Mi ne vog'à intigne, a tesa materiale
D'un corpu faticatu è chì vole crede
In lu pozzu di l'acqua musicale
Chùn puderà nigà l'offerta d'a mio fede.
Mi ne vog'à circà, ciò chì mai persu
S'hè perpetuatu in l'eternu paura
Di l'eternu amore chì ci s'hè immersu
È chì l'ochju divinu sempre sempre cura.
Mi ne vog'à scurdà la sete infinita
Mai mai stanciata, oghje più nùn speru
A notte hè venuta mi sente la vita
Mi ne vog'à lampà mi indè lu pozzu neru.
CITÀ
Cità maiò da l'omi abbandunate
U sognu ind'è u fume
Di a giuventù scurdata
È e mode d'altrò
Ch'occupanu i mumenti
Di i lasciati soli à mez'à li turmenti.
Cità maiò di case accatastate
Sò chjose ind'è u cimentu
E stonde disgraziate
Di l'uniche cunfine
Chì sò lettu è travagliu
Senza nisun'sperenza di vince'ssa battaglia.
Cità maiò di l'albe fumicose
Tante sfiere turmentu
Contanu l'ore chjose
È st'ultimu viaghju
Quallà ver'di u paese
U pientu siculare sott'à u stracciu tesu.
Cità maiò à l'usciu d'una storia
Aspettate gulose
L'omi senza memoria
À l'entre d'un età nova
Chì hè l'ultima fossa
Di a vita cumuna chì fù a nostra forza.
Cità maiò chì di sciagura site
Cità falze e sperenze
Di negru culurite
Cità ultimu sguardu
Di l'anima tratechja
Vi sbaccarà u tonu è struge a saetta.
COR'DI PANTERA
Principià vogliu
Di mi'amore la guerra
Cun tantu orgogliu
Mi t'ai lasciata o cara
Or'di tuttu què mi spogliu
Ben ch'ella mi sia amara
Ùn mi pare d'esse degnu
Mancu più di vive in terra.
M'avie prumessu
Di tè m'era ingagiatu
Davant'à Diu
Ghjuramentu prestatu
Prufitatu ai di mene
Quandu er'à lu sullatu
M'avia fundatu un palazzu
È l'aghju trovu spiantatu.
Tuttu spiantatu
È senza fundamenti
L'altri attendenti
S'eranu messi nentru
Eu ne girava à l'intornu
Cun orgogliu è gran'turmentu
Si stata cum'è Bazaine
Quand'ellu ordì tradimentu.
Cor'di pantera,
Fiera più ch'hè una tigra
Tù m'ai traditu
La mio sincera amica,
È ch'eu ti veca vucane,
Scalza, spugliata è famita.
È pò ghjunghje à la mio porta
Cù l'abbitu d'arimita.
Ti dò ghjasteme
Diu ti dia scugnuri
È ch'eo ti veca
Per aria cum'è i nuli
Chì tù ùn trovi frutti in locu
Nè macerbi nè maturi
Aveti da succore eu
Videresti l'omi crudi.
Cor'di pantera
Tù ne serai in eternu
Chì à lu mio core
Ficcatu ci ai un pernu
Eu sò cum'è li banditi
Chì stanu fora l'inguernu,
Sò cum'è li gran'suffrenti
Chì vanu à brusgià à l'infernu.
Quì chjodu u fogliu
Cun tristezza infinita
Tutta sperenza
In u mio core hè sparita
Quella chì n'hè la cagione
Di nunda sia esaudita
Sianu lacrime è sangue
U restu di la to vita.
ESSE
À l'alba scunnisciuta di li to primi sogni
Issu sbardu incuriusitu à l'entre di u mondu
U mondu sempre novu à ditt'i to bisogni
U celu à l'infinita u mare senza fondu.
Esse.
À l'ora benedetta di li to primi passi
L'inforcu senza fine chì tuttu hè da truvà
Esse la meraviglia è lu smeravigliassi
Mille sò le canzone è mille ai da cantà.
Esse.
L'amore chì ti cresce è stacca e to stonde
A terra chì ti porta nutrisce i to versi
A manera furiosa di stringhje ancu l'onde
Esse'ssa supranenza ; i to penseri immersi.
Esse.
U filu di u tempu chì scrive e to cunfine
Imbucina a to vita à u ghjumellu più strettu
Esse la forza in tè chì ùn teme la fine
Matura lu to attu, infiara lu to dettu.
Esse.
U soffiu di u tempu chì copre u to sensu
Chì acceca a to lumera è cambia i to bisogni
In l'eterna maestrà d'esse di lu silenziu
Eppò lu mare immensu tracarcu di sogni.
GUERRIERI
Centu milla guerrieri anu francatu la bocca
Tutti vestuti di lume cun trumbett'è cun tamburi
Facenu trimà la terra chì seranu l'auguri ?
Centu milla guerrieri anu francatu la bocca.
Fissanu un puntu luntanu, a vittoria chì s'avvicina
U nemicu soffrerà sterperanu u so locu
Pè di qual'hè u maestru, diceranu cù u focu
Fissanu un puntu luntanu, a vittoria chì s'avvicina.
Ma daretu à l'armata l'ultimu hà passu stancu
Carcu à sudor'è sangue trascina la so miseria
Luntanu dananzu à ellu c'hè una musica guerriera
Ma daretu à l'armata l'ultimu hà passu stancu.
Lu so cantu hè di silenziu è la so paroll'hè muta
Pensa à ciò ch'ùn hè più per ùn sente ogni sassu
Di stu caminu di croce chì ormai hè lu so chjassu
Lu so cantu hè di silenziu è la so paroll'hè muta.
Ma sintite la mio voce, sintite la mio canzona
Per l'ultim'umanità è per l'ultimu suldatu
Li so guai lu so sangue, u so passu trascinatu
Hè per ellu, ellu solu ch'eu cantu sta canzona.
Ma sintite la mio voce, sintite la mio canzona
Per l'ultim'umanità è per l'ultimu suldatu
Li so guai lu so sangue, u so passu trascinatu
Hè per ellu, ellu solu ch'eu cantu sta canzona.
L'ETERNU
L'eternu port'à l'eternu, a muca di u tempu.
Ma in paese meu, l'eternu u soffia u ventu.
D'eri à oghje a listessa strada,
A strada eterna di u sempre, di u sempre.
U sempre fattu straziatu, testimone sò e teppe.
Mure accatastate, orte di u tempu andate.
Calcicate da l'umani, cù e so sapienze strane.
E soie eranu linde nimu 'ùn l'insignava.
Fatte di vita, fatte di morte,
Fatte cusi fatte di sorte,
Ma l'arba colla è morenu l'orte.
Ortu quì ci n'hè unu, l'aghju vistu eramu inseme.
Pulitu eppò zappatu culor' di veranu.
Un ortu appruntatu da e nostre mani,
Per i populi e per dumane,
Per dumane !
L'eternu...
PER U TROPPU
Per e famiglie stirpate
À l'entre d'un mondu novu
Per e terre abbandunate
Induve nisunu si move
Per tanti chì sò cascati
Sbagliati da lu to stracciu
Ti stupu in faccia.
Per'ssa lingua pruibita
Chì sapia tante fole
È i zitelli insischiti
À e porte di e scole
Per a lingua ch'oghje scrivu
È a via ch'ella traccia
Ti stupu in faccia.
Per'ssi batelli vituperii
À u mutà di e stagione
Per l'inghjulia è la miseria
Chì sò in le mio canzone
Per u core chì si stringhje
Ghjuntu à l'ultimu dispacciu
Ti stupu in faccia.
Per e to bucie infame
I to soldi è e to terre
Per quelli morti luntani
È tanti chè tengu cari
Per a forza chì ci tene
In u seculare abbracciu
Ti stupu in faccia.
Per e stantare muderne
Chì a guerra sò spechji
È per e stonde d'infernu
Ch'elle contanu à i vechji
Per u mio figliolu natu
Chì mi spalanca e bracce
Ti stupu in faccia.
SOGNI ZITELLACCI
Ùn ci n'era battelli cù le vele imbuffate
Da visità lu mondu o girà lu Terraniu
È mi facia in capu è mio giarandulate
Ma turnai cù mè più d'un ricordu stranu.
A notte s'o ci pensu o sia puru in sognu
Mi vene st'armunia è'ssi dolci parfumi
I balli infiarati per un vechju demoniu
È la notte s'accende di millaie di lumi.
Una donna chì balla era forse una dea
Accorta u mio fiatu è quellu di a folla
L'oriente carrezza è ne serà la mea
Sta manu chì si stringhje è stu sangue chì bolle ?
A sciabula chì pende à lu mio currighjolu
Mi batte nant'à l'anche è luce sott'à la luna
À mi dete un guerrieri ch'ùn avia figliolu
È chì sentendu l'ora disse "bona furtuna".
Tandu sì chì l'avia a puesia in capu
Puesia di luna svapurata à lu sole
Ùn ferma dighjà nunda di stu tempu beatu
È i ghjorni à stu mondu paren'anch'elli fole.
SUNATA
Pienghje in mè cum'è a rosula
Di u so ultimu veranu
Pienghje in mè cum'è una nottula
In lu viotu di li mio anni.
Pienghje in mè cum'è u fiume
Di u so amore cusì longu
Pienghje in mè cum'è u fume
Di sta canzona ch'eo songu.
Pienghje in mè cum'è un stritu
A puesia ch'ella fù
Pienghje in mè cum'è u nidu
Viotu è u scherzu di mai più.
​
​
