Dumani
TÙ BABBU IN DICCIOTTU
Aviu cinqu'anni ùn sapiu parchì
Piinghjìa Zia Ghjustina cù Ziu Francè
E mamma m'hà dittu parchì voli sapè
Sì 'ghjà troppu afflittu sè capiscu bè
Saparè più tardi parchì Ziu Francè
Cù Zia Ghjustina dicìa seti trè
Tu babbu in 18, frateddu in 43
E oghji fiddolu, oghji tocca à tè
In faccia à u caminu piinghjìa Ziu Francè
Pò Zia Ghjustina dicia ò Ghjasè
Parchì u scumpientu ùn s'hè presu à mè
Chì da 'ssu mumentu hè persu ogni bè
Sè oghji in ramentu ùn'hè incù piacè
È solu chì sentu ssi parolli in mè
Tu babbu in 18, frateddu in 43
E oghji fiddolu, oghji tocca à tè
E tù paisolu quandi u mali c'hè
Porti u to dolu, l'addisperu in tè
Com'è ssi ziteddi ch'ani com'è mè
Vistu vichjuleddi pienghja à ùn più pudè
Ma no, Zia Ghjustina, avemu par tè
In cori una spina ch'ùn si sà parchì
Tu babbu in 18, frateddu in 43
E oghji fiddolu, oghji tocca à tè
Tu babbu in 18, frateddu in 43
E oghji fiddolu, oghji induva sè
A LUTTA PUPULARI
Sentu pienghje u me paesu
Mà inertu un possu stà
Quandu u stintu porta u pesu
Mancu a pace un pò campà
Sentu suffià u rascesu
Chi mi dici pà un piegà
Quandu l'idea francesa
Ti custringhji a tribulà
Fà chi a lutta pupulari
Si chjami rialità
E 'ncu a lutta pupulari
Chi a sintenza cascarà
E ssa luce ch'un s'e mai spenta
A svilatu a so vulintà
D'essa vivu in ogni tempa
Par chjamassi eternità
Cume ssu focu chi s'e fattu
Per pruvami rialità
E incu a storia e attrattu
Pà ch'eu pudessi chjamà
Oghje a lutta pupulari
Diventi rialità
E incu a lutta pupulari
Chi a sintenza cascarà
Quessi chi parlani d'amori
Vurianu veda cripà
I to fiddoli di cori
Pà pudessi avilinà
Tandu fà chi a to Nazioni
Di u so populu un sia diserta
Scaccia a putenza ch'imponi
E fà chjuda a so ferta.
Fa chi a lutta pupulari
Sia custenti pà campà
E incu a lutta pupulari
Chi a sintenza cascarà
I to lagni cara Nazioni
Si so sparti in l'imensità
Corsu attenti a u rintornu
Mà se tu voli inghjurà
Sare stuvu d'esse inumanu
Quandu l'insulta t'agrancarà
Si tu aspetti d'essa vanu
Pà cunsente a dichjarà
Femu a lutta pupulari
Pà Nazioni eternità
E incu a lutta pupulari
Chi a sintenza cascarà...
Sta sente o paisa
Stà a sente O paisà
Tu chi ti teni sticchitu
Ch'a scambiati di vistitu
Ch'un ti lasci più andà
Un porti più a baretta
E vicu chi a to ghjachetta
E a fattoghja d'avà
Stà a senti O paisà
A vindutu a ghjunghjiticci
I purritti e i prunicci
E un sa più indù andà
A fattu una caccighjatta
O qualcosa più sacrata...
Un sa più indù passà
Stà a sente O paisà
Par te u solu pinseri
E di passà i to seri
A vighjà e spassighjà
Allora ti ni stà fora
Chi ti s'arringuarda l'ora
Indù tu l'a d'arizzà...
Stà a senti O paisà
Tu chi t'a a stacca piena
E dinari cume rena
Lasciati avvicinà
A la to calzetta pretta
Di muneta e di biglietta
Mà un n'a più pruprietà...
Stà a senti O paisà
Di'ssi sangui ch'e cascatu
Pà ssu chjosu o pà ssu pratu
Tu un ti ramenti più?
Mà ssu sangui e ssu sudori
Erani di i to maiori
E chi pinseri n'a tu?
Stà a senti O paisà
Tutti i fiumi vani a mari
E cussì so i dinari
Chi accuzzatu tu a
Quandu saranu finiti
Ti murzicarè i ditti
E u pientu scapparà
Stà a senti O paisà...
Maria
So finiti li spiranzi
L'amore e la simpatia
Un semu più quel' di nanzi
Parchi nun c'e più Maria
Mà quantu se stata falsa
E pà me sempri crudeli
Un n'a mai vulsutu creda
I me paruli sinceri
Oramai versu te
So statu sempri fideli
Malgratu e da luntanu
Ni pensu a lu nosciu amori
Ô cara di lu me cori
Ti n'ha pigliatu l'amori
Mà lu più ch'eu ci pensu
E quandu cala lu soli
Po un ti n'inveni più
Di u nosciu tempu passatu
Quandu nò eramu ziteddi
Ch'era lu to 'namuratu
Chi tu ti ni se partita
E m'hai abandunatu
Quantu so belli i to labbri
Più belli so li to ochja
Mà vularia qualchi sera
Abbracciami a i to vinochja
Ô la me lumeri incesa
Chi mi dà lumu in la notti
Ormai di chjinaci insemu
Soga nun n'era la sorti
Tu nun pò creda Ô Maria
Quanti eu t'amaiu forti
Nun ci vogliu più cullà
L'istati in Cartalavonu
Parchi nun c'e più Maria
A u friscu di u puddonu…
Parchi nun c'e più Maria
A u friscu di u puddonu...
Vita stintata
L'omu si sveglia a mattina
Quandu chjoccu u ruloghju, per travaglià
Piglia a strada di l'usina
Dapoi trent'anni dighjà
S'e tracciatu u so distinu
Ma quale u pò cambià?
Ma quale u pò cambià?
U tempu e l'arrutinu
L'omu si piegherà
In a so vita
Schjavu sempri sarà
E di ssu pesu
Mai un si staccarà.
L'omu ripigliu u so passu
Quandu a sera s'addurmenta u paesi
S'avvicina u capu bassu
Qualchi lumi so accesi
In a so casa chi l'aspetta
A so vita e stintata
A so vita e stintata
U manghja e u lettu
Ugni sera pà festa
E l'omu stancu
Cu i pinseri in testa
Cusì si chjina
A moglie a u so fiancu
I CUMBATTANTI D'ONORI
Quantu casi bioti ind'è vò paisani
Ch'aveti par dota u vosciu cori umanu
Pò quantu ziteddi l'ochji carchi à paura
Stridan'in faccia à quiddi chì mai n'ani primura
Vò pà tutti ziteddi frusti da u dulori
Campeti sottu à i steddi è senza più timori
Quandu spunta l'alba cumbattiti cun ardori
L'impegni di tutti 'ssi signori
Frà mezu à l'ingannu eu salutu u vosciu onori
Chì annega u vintu traditori
O quantu turturi quantu disparizioni
Ma casca a paura quandu nasci raghjoni
Si sparghji ugni ghjornu un cantu di virdura
Fiurisci è à l'intornu faci vita sicura
Sè tu generazioni nata à mezu à u tarrrori
Porti la to passioni, pà l'altri u dulori
Quandu spunta l'alba cumbattiti cun ardori
L'impegni di tutti 'ssi signori
Frà mezu à l'ingannu eu salutu u vosciu onori
Chì annega u vintu traditori
L'Omu
Un omu era pusendu annantu a lu so zuddu
U so capeddu in manu asciuvaia u sudori
Chi misciava da u fronti chi eramu di luddu
Staghjoni a piu cruda d'annoiu e di calori
E po l'omu allisciava u so capu sbiancatu
Da l'anni e da u stentu e da tanti pinsera
Di tutt'una ciucciata solu era firmatu
In 'ssa casa paterna pa viva so manera
Tutti li so fiddoli si n'erani andati
A stintà pani fora cussi hè u distinu
In 'ssa tinta campagna induva quiddi so nati
Ni francani u mari chi l'avvena hè mischinu
Ma u so capu biancu piu biancu duvintaia
Videndu di i so chjosa i muraddi sfraiati
Tristu e pinserosu u tintu suspiraia
parlendu da par sè ramintaia u passatu
E quidda casaredda induva tanti ziteddi
So nati so crisciuti hani risu e po pientu
E dopu tanta gioia cume in un volu d'aceddi
Ni so tutti fughjuti in un buffulu di ventu
Chi ci aghju piu da fa in 'ssi rughjona cari
A posta chi piu nimu mi teni cumpagnia
E chugnunu hè andatu a godassi u mari
Cume si a campagna hè tarra d'arasia
E l'omu addispiratu da a so sorti crudeli
Stringhjia u so capeddu par impidi l'angoscia
Chi li spizzaia u pettu pisendu l'occhja in celi
Prigaia u signori di tenali a coscia
SUFFRENZA
Quessu chi pensa chi l'omu
In ssa terra senza amore
Un ghjornu smenticarà
Tutti i guai e u malori
Prontu e a fà cascà
A sintenza di u delittu
A nantu a l'omu traditu
In tanti paesi povari
Pienghjenu i so nucenti
Senza abandunà i terri
Chi li brusgianu ssi ghjenti
Senza cori ne pietà
Per quessi senza furtuna
Pieni di calamità
Quessu chi voli manghjà
Senza sparte u so pani
Incù l'omu di quallà
Chi li tendi a so mani
Ch'ellu voghi a sturzà
Nimu un u pinghjerà
Quessu techju a crepà.
Quandu vecu a suffrenza
Cresce in ss'umanità
In faccia a tantu putenza
Ch'assufocu di benistà
Dicu a tutti l'inghjuliati
Chi ci voli a marchja
E mai più pardunà !
Dumani
A brusta hè un focu ch'ùn voli micca mora
Com'ùn pudarà mora 'ss'isula tant'amata
Sè tutti i so fiddoli da drintu è da fora
L'aiutani à sfrancà si da 'ssa dura imbuscata !
Dumani suffiarà à nantu à quissa brusta
Un ventu d'aria pura vinutu da u cori
Chì darà nova fiamma à una zidda frusta
E chì farà pisà un'alba di splendori !
Dumani quissi casi chì oghji so sfraiati
Sarani dinò pieni di risa zitiddina
Quissi chjosi è 'ssi prati fin'avà tralasciati
Ùn timarani più d'andà à a ruvina !
Dumani a ghjuventù chì oghji s'addispera
Fighjularà l'avvena cantendu a so spiranza
E ni suminarà un'amicizia vera
Da induva nasciarà ghjustizia è fratiddanza !
Volta figliolu
In ‘ssu paesi spintu
Un si senti un fiatu
U soli s'e calatu
Silinziosu spaventu
In su chjassu disertu
Più nimu un n'a marchjatu
Da l'alba a l'abbughjata
U tempu passa incertu
In ssa natura strana
Un cresci più ghjnestra
Tragedia campestra
Vituperia umana
Nant'a ssu sogliu strettu
Più nimu n'e francatu
L'omu si ne scappatu
Lasciendu tuttu apartu
Volta fiddolu
Aiò chi ora
Volta fiddolu
Paesi mora
In ssa tarra d'onori
Quidda di i nosci antichi
Spunta tanti castichi
E strappa tanti cori
Chi u Corsu inghjuliatu
Di ùn pudè campà
Da u mari a francà
Diventu un esiliatu.
In ssu paesi viotu
Un c'e soffiu di vita
Sola a raghjoni ardita
Pò dà u ricunfortu
Chi tu l'omu luntanu
Rivenghi in a to tarra
Pà una vita fiera
E no di galerianu
Volta fiddolu
Aiò chi ora
Volta fiddolu
Paesi mora
Volta fiddolu u tempu chjama
Volta fiddolu
Pienghji a to mamma...
L'infernu terranu
So solu u frateddu di i patrioti ghjusti
Di i vechji e di i ziteddi di a natura e di a brusta
Di tutti l'inghjuliati sbagliati da l'umani
Pò i ghjenti straziati da u casticu furdanu
Eu socu u frateddu di i criaturi santi
Nati in fosca mattina chjamendu l'universu
Vogliu parlà di quiddi trallasciati in un cantu
O quiddi ch'ani persu e i mammi mai chjamatu
Eu so lu frateddu di u tintu paisanu
Chi si stappa u ciarbeddu d'inguernu fin'a branu
Ch'un vinci chi sudori e si vasta u sangui
Sapendu incù s'amori chi a sò vita s'infanga
A VINDEMIA
Aiò ! chi l'alba
Veni di nascia
U vintuleddu
Svighja a cascia
Di l'ulmu in piazza
Carcu di pula
Lionu abbaghja
E si scuzzula
Oghji a vina
Pien'd'uva pretta
Pà la vindemia
Pronta c'aspetta
Fà ch'iddu frombi
U timparinu
E culma prestu
E to cuffinu
Tadda a graspa
Pien'di sapori
Senza rimorsu
Falli l'onori
Ch'idda duventi
Vin'di deliziu
E ch'idda doghi
Salut'e viziu
Si tu se stancu
Sciaccat'un morsu
Dalli di mani
A u vinu corsu
Fussi di piana
Fussi di costa
Chi a biuta
Ni fali tosta
Baccu cuntenti
Cant'e suspira
Facci u contu
Di i balira
Di vinu novu
E d'acquavita
Pà aggustalli
Prestu c'invita...
​
​
