esciutu in lu 1990
Sorti en 1990
Cuntrasti e Riccucate
À TÈ
O le stonde infiarate
Chjosi in l'abbrucate,
Di li ghjorni d'inguernu,
O le stonde chjarine
À l'orlu di e marine
È tù sì lu mi'avene,
È tù sì lu mi'avene.
O le stonde piacè
Quandu mughju per tè,
U cor'di lu mi'amore,
O le stonde silenziu,
Un soffiu di parolle
Per unicu rimore,
Per unicu rimore.
La durghi senza fine
A stonde maturime,
Di u ti tengu cara,
Chì stringhi i nostri passi,
Per fà listessu chjassu,
È pè scallassi inseme,
Sempre à listessa fiara,
È pè scallassi inseme,
Sempre à listessa fiara.
À TÈ LA CORSICA REGINA
À tè la Corsica Regina
À ella tù
È lu pocu di sta rima
À ciò chì fù.
À tè lu ventu chì scuzzula
L'alburoni intimuriti
Spazzendu in terra la pula
Di li to passi smariti.
À tè l'abbracciu di sta terra
À i purtelli di a notte
Quandu si tace ogni guerra
È s'aprenu le centu porte.
À tè la Corsica Regina...
E centu porte di l'avvene
I centu mesi di u ritornu
Ciò chì fughje è ch'omu tene
Cù a sperenza chì ùn ghjornu...
À noi d'un lacà travià
È d'un pienghje à mille voci
U tempu hè fiume ùn ci vole à fà
Ch'elle s'ingorghinu le foci
À tè la Corsica Regina...
CATENA
Fideghja lu to fratellu
Li stringhje una catena
A listessa di a toia
À noi tutti ci mena.
Sè nò tiremu tutti inseme
Forse ch'un ghjornu sciapperà
Da fà ne un frombu, frombu, frombu
Chì ribombi da mare in là.
Sè nò tiremu tutti inseme
Forse ch'un ghjornu sciapperà
Da fà ne un frombu, frombu, frombu
Cumu un cantu di libertà.
Discorre cù u to fratellu
Ci vole appruntà l'avvene
Sol'un idea cumuna
Hè la forza chì ci tene.
Sè nò tiremu tutti inseme
Forse ch'un ghjornu sciapperà
Da fà ne un frombu, frombu, frombu
Chì ribombi da mare in là.
Sè nò tiremu tutti inseme
Forse ch'un ghjornu sciapperà
Da fà ne un frombu, frombu, frombu
Cumu un cantu di libertà.
In terra di Cursichella
S'hà d'addunisce la ghjente
Per un abbracciu cumunu
Chì serà nova sumente.
Sè nò tiremu tutti inseme
Forse ch'un ghjornu sciapperà
Da fà ne un frombu, frombu, frombu
Chì ribombi da mare in là.
Sè nò tiremu tutti inseme
Forse ch'un ghjornu sciapperà
Da fà ne un frombu, frombu, frombu
Cumu un cantu di libertà.
Sè no vulemu da veru
Ch'ùn ci sia più pastoghje
Nè pè l'unu nè pè l'altru
È canta sottu à e loghje.
CI VOLE CUSÌ POCU
Basta una bunfulata per carrizzà u fiore
O stradicà à talla di l'alburu sfrundatu,
Accadizzà u focu natu da lu furrore,
Natu da lu furrore,
Basta una bunfulata.
Abbasta un solu raghju di u sole à ferraghju
Per sminticà l'invernu eppò dassi curagiu,
Per sunnia di coppii chì viaghjenu à paghju,
Chì viaghjenu à paghju,
Abbasta un solu raghju.
Ci vole cusì pocu per suppisà e pene
Per accende di l'anima u santissimu focu,
Di u travagliadore ruzzicà e catene,
Ruzzicà e catene,
Ci vole cusì pocu, ci vole pocu pocu.
Basta un sguardu fraternu per sentesi più forte
Un sole veranile in core di l'invernu,
Una manu stinzata per scunghjurà a morte,
Per scunghjurà a morte,
Basta un sguardu fraternu,
Basta un sguardu fraternu.
NANNA
Nanna, nanna nannannella,
Da fà i ghjorni sereni,
Pè u ciucciu u piulellu,
U tesoru chì ci vene.
Nanna, nanna nannannella,
Pè u to corpu dulcezza,
U muscu di a to pella
Chì a mio manu carezza.
Nanna, nanna nannannella,
Da cancella i frastorni
Aspittendu ch'ellu sbucci,
U sicretu di li ghjorni.
Nanna, nanna nannannella,
Per tutti li mio viaghji,
È lu mondu di dumane,
Induve ti purteraghju.
Eppò nanna nannannella,
Per tuttu ciò ch'hè in cumunu,
À sti paisoli cari
Chì l'eternità affuna.
Nanna, nanna nannannella...
SCIROCCU
Si pesa lu sciroccu da l'Oriente inzuccheratu
È scimiscenu l'adori da l'urbe à e marine,
Me l'arance hè sanguine frutti è suleoni.
Ventu di u meziornu salvatichu è infiaratu
Accarezza è fraia e culline tranquille
È la fiaccula ghjalla à la notte s'incrochja.
Aria impiumbata essenze di morta
Trizineghja l'isula sopr'à u mare d'oliu
È si pianta a vita cum'è una fiura.
Zittu sin'avà l'alivu di a piazzetta
Ci ghjoca a musica di a rinfriscata
È l'onda di u sognu ci porta pianu pianu.
U trattu prufumatu di citrunella d'oru
Ci ramenta paesi à e strane sumiglie
In un abbracciu turchinu s'addunisce l'Atlantide.
Tandu si a natura i so guai smintica
È rinvivisce tuttu l'antichi nemichi
Di pett'à lu ventu alluntaneranu
Quell'ochjata murtale.
SUMIGLIE
D'amore sò novi'ssi mumenti
Fiori d'eternu,
Cum'è stampe sicrete in lu ventu
D'ogni quaternu.
Coppiu novu quand'è tù nasci
Da fà ballà e to stagione
Hè un suppu di tè chè tù lasci,
In lu versu d'ogni canzona.
Di basgi sò colme'sse ghjurnate
O la magia,
Tù chì tant'anni l'ai allisciatu
Di puesia.
Quandu nascenu e famiglie
Per scrive listessa storia,
Di tante altre anu a sumiglia,
Carche di seculi è di memoria.
Di strade sò i nostri cori
O stonde care,
Scritte per sempre trà e sei corde,
D'una ghitara.
Quand'è tù campi d'amicizia
Da tant'anni cusì prufonda
Certi ghjorni ai a scimizia,
D'arrubbati ancu lu mondu.
U MARE DI CHINA
Eramu una bella squadra
È tuttu era in cumunu
Ma spessu venia a ladra
A sera ne mancava unu.
È la luna chì splendia
Sopr'à u mare di China !
Pienghjiamu acciucciulati
Mezu à le rise è le cantate
Eppò li pienti siccati
Muria ogni lindumane.
È la luna chì splendia
Sopr'à u mare di China !
E paghjelle in li caffè
Quandu sparia lu sole
D'induve noi u piacè
Venia carcu di fole.
È la luna chì splendia
Sopr'à u mare di China !
T'arricordi a notte nuvella
E briachine guasi à more
È quelle donne à brusgia pella
È quelle donne à brusgia core.
È la luna chì splendia
Sopr'à u mare di China !
Esciamu à ghjornu chjaru
Imbalsamati di vapori
Tutti ci paria raru
È cambiavanu li culori.
È la luna chì splendia
Sopr'à u mare di China !
Ma lu sole ci fraiava
Cum'è palle infiarate
È la luna chì splendia
Sopr'à lu mare di China.
U PARTIGIANU
Trà li mughji è li silenzii
Pienti zeppi assuffucati
Si hè pisata la voce
Di li populi nigati
Liberendu la Nazione
Feremu a revoluzione.
Cù li chjuchi è l'inghjuliati
Operai è paisani
Chì si frustanu la vita
È chì campanu poc'anni
Liberendu la Nazione
Feremu a revoluzione.
Contr'à Francia imperialista
Manu di li spluttatori
Contr'à i corsi impanzati
Sempre vili è traditori
Liberendu la Nazione
Feremu a revoluzione.
Per la terra di lu cumunu
Da i nostr'antichi lasciata
Chè n'avemu scumpartuta
Eppò oghje abbandunata
Liberendu la Nazione
Feremu a revoluzione.
Per la libertà di l'omu
Cù li populi fratelli
Contr'à u capitale ingordu
Chì li porta à i macelli
Liberendu la Nazione
Feremu a revoluzione.
Pè li vechji è li zitelli
Da la so lingua ligati
Per li corsi omi degni
Chì sò stati imprigiunati
Per a Corsica Nazione
Feremu a revoluzione.
Per a Corsica Nazione
Feremu a revoluzione.
U PRANZU
S'o vi pudessi discrive
A stundetta sfughjiticcia,
Chì sculiscia trà lu scrive,
Cum'è scagliola di diccia.
S'o pudessi mette in ballu
L'assestu di le mio rime,
Da fà credevi à lu callu,
À sta sporta di susine.
Agromba la malvasia
Fà spunta li pomidori
Fichi noci è puesia
Tanti fiori pè decori.
È matura per favore
L'uva dolce muscatella
Tirane u so licore
Empiene lu caratellu.
Offrevi à taulinu
Tutt'e grazie di signore,
Acqua fresca è bon'vinu
Chjarasginu di culore.
Pone in l'ortu di l'antichi,
E grazie di fior'eternu,
Annacquelle a puesia,
Eppò dalli un bon guvernu.
U tianu è a pulenda
I sangui cù lu ghjalaticciu,
Stagione senza serrenda,
Chjarasgi mez'à i ghjicci.
U pane fattu di fiore
Trà lu vinu e nostre stese
Cù li piatti u so culore
Cù la cucina francese.
E paste di la Tuscana
Chì'ssu ghjugnu si ne busca
U so piattu per cuccagna
Chì scurendusi l'encrusca.
D'ogni parte di u mondu
Vene un prufumu raru
Chì passendu sopr'à l'onde
È tumbustu u dolce amaru.
Eppò in gira à stu pranzu
Chì à mez'à la cuntittezza
La sicoia cum'è nanzu
L'amicizia senza vezzu.
La ribombi a nostra lingua,
La ribombi a nostra lingua !
VIAGHJU
Bench'è tù sì luntanu
À l'orlu d'altri mari
À sente d'altri canti
È l'acqua di u celu
In li to ochji chjari,
È l'acqua di u celu
In li to ochji chjari.
Bench'è tù sì luntanu
À l'orlu d'altri pienti
À balla d'altri passi
Sott'à l'acque nuvelle
In perlette d'argentu,
Sott'à l'acque nuvelle
In perlette d'argentu.
Bench'è tù sì luntanu
Altiera è luminosa
À ste petre assulanate
Bench'è l'immensità
Inforchi li to passi
È li mondi landani
Ùn aghjanu cunfine.
Ma ramentati li ghjorni
È ramentati le stonde
U nostru celu sanu
M'hè intratu in lu core
È hè nostru, quant'è lu nostr'amore,
Quant'è lu nostr'amore.
​
​
