Cilva live
Bianchineru
Andava ellu oscuratu soie di u ritrostu universu
esse sbiisgiulati sminticatu cancillattu di menti summiti
in l'oghje squarciatu senza più primura d'ammane o di l'ancu à vene
Andava ellu è ùn sapia più da u passa à u vene
Da l'esse à l'avè campava ellu u bianchineru
Alba
Orizonte indivisu trimuleghja l'alba in tramutu mu è ligeru
Orizonte tralintu s'aspetta l'acquata ùn si cala ancu
l'amore à fiancu cura una spira
a luce fatta à ghjornu scesu svanite e fate passione
arresa cerca un agrottu
Dolce stella luciola tinta manu di sposa è pelle avvinta
senza rimori à move amori
Luni santu
Dui ore
Capu in culu
Bocca trasecca
Luni santu
Dui ore
Donna nuda scunnisciuta
Lettu crosciu.
Gocciule d'amore
Gocciule di a rosula sanguinosa
Mi so cascate in pettu à gocciuloni
Pagni rebbii amore infiaratoni di brarna
scatinata è furiosa
tù u mo bellu fiore primaticciu caru
ùn t'aspittava è m'ai trapanatu
d'un colpu solu murtale
culmatu d'un ansciu di vita nova è raru
m'ai datu forza ma dinù debbulezza
so u schjavu di a to chjara billezza
a brava ghjente m'hà incarciaratu
dendu mi u visu d'un scemu
liatoghju ingannatore d'un amore strapazzatoghju
mai eiu sè fattu di stintu ladratu Gocciule d'amore.
Marti santu
Trè ore
Notte corta
Sonnu mossu
Marti santu
Trè ore
Donna mea
Incertitudine di l'amore.
Cilva pisiva
A materia chi s'accresce in e mente
di issa bella cità
ad orlu di mare m'arreca schivinghju è disprezzu
amare ùn so di lamicizia falza d'issa ghjente
u sguardu singulare di a sincerità
cunnoscu lu so lume limpitu è chjaru
ind'è i mo pari spechjulime caru
ingutuppu di fiatu è sicurità
n'aghju poca primura di isse varmine
nutrite da a roccia puttachjosa ch'elle scioppinu
da a so lingua leprosa !
pè mè u mo mondu hè senza cunfine
senza rete è senza inchjustramentu
vogliu esse u figliolu di u ventu.
Marcuri santu
Sette ore
Matina dolce
Labbre rosse
Marcuri santu
Sette ore
Labbre avvinate
Capu tizzunatu
Hè sole duru.
A perula d'Oriente
Pianu dolce Cilva si sveglia pianu
Cù a so solita pianura prufonda rege
qui l'armunia muta di l'onda
billezza è calmu si ghjacenu pian'pianu
in u più bellu in u serenu ascugnosa
s'affacca una perula d'oriente rebbia
di giuventù è spampillulente di billezza
muresca affascinosa
stamane a so spera firmata in mente
hè di parte ver'di l'abbraccera sacrata
cù u so amore pà esse a so spusata
ma a riligione alluntana a ghjente
è sta mane qui a storia fù sviata
u so bapu l'ammazzà à cutillata.
Ghjovi santu
Bon'ora -
Dui ghjorni senza dorme
Ghjovi santu
Bon'ora
Acqua ùn ne beiu più
Solu liquore.
Anima
Anima ventu chi traghje in core
intrecciu vivu di e mo voglie
anima ventu chi traghje in core
à cuntà l'ore di i mo oddii.
Anima celu di stelle ingordu
à fiurisciate e si accoglie
Anima celu l'immensu sordu
Spechju pisivu di l'orgogliu.
Anima fiume ad'onde saziu
Fiumara sciocca di scuntramare
Anima fiume chi và à laziu à tumbà l'omu
à u so sugliare.
Anima terra di tant'ardore
Mischjame di strasurdinariu
Anima terra lagnu è amore
Di l'indecisu u santuariu.
Vennari santu
Bughju
Vomitu rossu
Sangue è vinu
Vennari santu
Bughju
Pena à u core
Pena à a vita
Solu dulore.
Beie à stancià dulori
Beiu quantu ùn ne pudmaghju più
è sappia quant'è tù mi piaci
savore di vodka friscura di l'este liquore
caschi seccu à nbocchi in u me fondu
riempii u mo core insanguinatu
ormai rimitu è scunsulatu
chi beiu quantu ùn ne pudaraghju più
à surpatoni m'aiuti à sminticà
perchè beiu cusI è tutte e so cagione
ùn pensu più à l'umana cundizione à surpatoni
m'aiuti à annicà l'oddiu meiu cù tutta a mo suffrenza
è u malcapitu di a to partenza.
A mane arresu
Quandu calusgiuleghje l'alba à zirlata
Chjappendu l'ultimi tranchji straviziosi
Hè stonda chi compie l'arti viziosi
D'issi viaghjatori à straviata
Omi di notte tempu sciucchittanite
Cari cumpagni di sogni ammazzati
Capiscu i vostri dulori ficcati
Da l'ogni ghjornu è de tutte e so lite
è nant'à i pisticciuli fumicosi
schizzi caldi neri d'issa falza testa
ùn vecu chè tù andatura celesta
alba à centu mila ragi fumicosi
mi ribombe sempre a to musica eterna
cù quella chi sarà l'unica.
Sabbatu santu
Ott'ore
Apiritivu
Ma pelle bianca
Sabbatu santu
Nov'ore
Briacu persu
A mezu à tutti
Cù una donna.
Dumenica di Pasqua
Murtoriu
Vittura cascia
Mamme in dolu
Chi belle Pasqua
Murtoriu
Capu inciacciatu
Ind'u catromu salvatore
Cù una donna
A morte
Tale a sfracillera di a saetta
si partutu tale l'ammazzata maladetta
s'hè firmata a to esistenza
a mo mente ùn a si pruvava à capisce
la capisce e cagione di a to scumparsa
innô ùn u pudia micca
ma vedi so sempre qui
ùn aghju da scurasgisce
mi di pettu à a vita sô cum'è tè
quand'omu mi vole fà stà bassu
ancu mutu a mo voce si lintarà
è nigà o ghjastimmà l'aldilà
hè ùn crede in tè chi so vivu è tù,
u to amore so firmati pè sempre
ogni ghjornu si perde qualcosa,
si perde u tempu a ghjuventù,
a ghjente ch'omu tene cara
ma soprattuttu mai sfiatà
si mai piantà chi ci vole à gode
di lu so campà prima di divintà polvara.
Battelli
Battelli vile tranquille manghinate
à u vintulellu di l'alba
battelli porti è marine chiete calate
bianchicciule di sale è di sole
battelli ombra di piscadori voganu in l'acque
linde di mondu ancu à rinasce
battelli viaghji lochi da sunnià ad'ochji aperti
battelli à ventu in puppa l'omi so in via
mentre dumaitina si disceta.
​
