Cattivu sonniu
BRUTTA LINGUA
​
U pesu di a parolla ditta
S'eddu si pudia stimà
Valle quantu a parolla scritta
Si ponu ancu marità
Ma si deve sape sopr'a tuttu
Innanz'à di di o d'impinnà
S'edda facci sunà viulinu
Dà ordini à u canone di tirà
O chi piaccè di cuntà o scriva
Hè a prima di è liberta
Ma in'bocca à u spiritu tortu
In' vilenu si po scambià
E tandu s'imbrutta i memorie
Si dice buccii à vulintà
Libri, canzoni è discorsi
Oghje so qui pà tistimunià
Chi sumena spini, ùn vaghi scalzu
Certi si so scurdati di què
Calzati di stivali di coghju
Pà eddi periculu ùn n'hè
Ma quandu si sarà frusta a sola
U tangu avarà crisciutu bè
E u tempu eddù ùn si ni scorda
Di rende à ogn'unu so bè
SCALZU
​
Corra scalzu lu mondu saria un me piacè
Mi piantu una stonda spiegu perchè
U mondu pà apra l'ochji
Pà veda è pà sapè E capiscia, l'altru latu
Mi n'andariu scalzu parchi tempu n'ùn ci cè
U scarparu hè sarratu è dormi bè
Ch'eddu li fessi pro mà eiu mi ne vo
Senza scarpi è senza funa
O corra scalzu lu mondu
RICANTU
Veda cum'ellu balla tondu
Ind'e u me fangottu assestararaghju bè
A me tarra, à me lingua soli rè
E po strada facendu e sparghjeraghju bè
Pà incantà lu mondu
RICANTU
Da cismont'à pumonti senza mai piantà
Un' ci hè temp'à u riposu devu andà
Circà in ogni locu a grana di u benistà
Vultà è suminata
O corra scalzu lu mondu
Imparà à ùn più ballà tondu
EDDI SO
​
Eiu eru un ziteddu natu in diciottu
Urfanellu so vint'anni avà
Eiu stantu u me pani cusgiu i mè panni
Parchi u soldu ùn ci hè
Eddi, eddi, so ricchi chi mi danu impieghi
Eddi, eddi, ani una casa, pari un casteddu
Eddi pà chjàmà à a so tolla, ani una campanedda
Eiu compiu a ghjurnata, mi n'entru in'à me casetta
Biota di vita
Eiu aghju trovu quidda chi vulia bè di me ma m'hè diffesa
Eddi, eddi, ùn ni sanu nudda di st'amori sinceru
Eddi, eddi, pà a figliola, ani sceltu u stragneru
Eddi l'hani da marità, l'ani da metta l'anneddu
Eiu ùn possu creda chi a me bedda hè prumessa
Mi crepa u core
Eiu servu ma fieru, l'aghju dicisu, sta sera, partu suldatu
Eddi, eddi, a punaranu scuzzulà a campanedda
Eddi a vidaranu bè, saraghju culuneddu
Eddi quandu turneraghju, avarani rispettu
Eddi, eddi, m'acceteranu pà metellu l'anneddu
URFANEDDU
​
Cercà u soli pà scaldassi u spinu
U frettu in'ossi un risapr'à nimu
U so passu hè cortu un'hè piu sicuru
E a so peddi li brusgia
A sessant'anni hè un' omu frustu
E certi ghjorni amaru lu gustu
Tanta suffrenza, dulori, tantu mali
Cum'è un cundanatu aspetta
Purtant'hè liberu ma ùn po fughje
I so pastoghje si chjamanu agughje
E poc'à pocu eddu si ni sdrughje
Cum é nev'à u sole
Malana infama, l'hà pigliatu tuttu
Un'viaghja più, hè firmatu mezu muttu
Ma u dulori, u dulor'u piu bruttu
Hè di lascià i soi
I so ziteddi, a so moglia, so vicinu
Sarr'i so ochji, ùn senti piu à nimu
E pianu pianu u so soffiu si spinghji
Chi vinuta l'ora
CATTIVU SONNIU
​
‘ssu sonniu l'aghju fattu, ùn' so quantè nuttate
ch'ùn si ni và piu
m'hè firmatu in' capu cùm' è storia imparata
ind'à me ghjuventu
mi sveglia ogni notte, hè edd'u più forte
è l'ochji ùn sargù più
è tutt'e so fiure si movenu nant'à u muru
d'a me stanza quassù
ùn possu più, più straccinà ‘ssa somma
‘ssu pesu qui v'arruin'un omu
è d' a me mente s'hè appart'un balconu
è hà lacciatu entre, hà lacciatu entre ssa canzona
principià sempri listessa, ind'à fumaccia spessa
veg'un fiume quandà
semi un pugnu d'omi in sangui è in sudori
pruvem'à luttà
ma l'altri so più forti, ùn si conta i morti
ùn sogu più chi fà
è annant'à u ponte tamant'armata pronta
è semi persi avà
aghju sunniatu quandu sunniavu ma ùn sonniu più
aghju sunniatu quandu sunniavu ma ùn sonniu più
AMARU ODORE
​
C'era qui tempi fà, ùn mi dumandeti quandu
C'era qui tempi fà, aspitetti a vi contu
C'era un paisolu di casi di petra
A fianc'à una vaddi prufonda
A i pedi di i muntagni maestuosi
Si vidia lucicà l'onda
Ma oghji qui, eiu ùn so parchi
‘ssu locu di hè cambiatu
Qui ferma avà di'ssi tempi di
Un ferma più chè l'odore
C'era tandu in'ssu paesi tanta richezza ogni loca
Castagnicci è alivetti, tant'è tanti chjosi posti
Un era mancu spuntatu u sole si sintia
Pà ‘ssi campagni
Chjuccà a frusta batta a piola
Sin'à u chjoccu di a campana
Chi ferma oghji vi dumandu
Chi ferma di ‘ssu mondu
Di ‘ssu paese di ‘ssa muntagna è di ‘ssa vaddi prufonda
Ind'u paese piegnenu ancu e petre
A muntagna, u focu l'hà monda
E ind'u fondu di ‘ssa vaddi i palazzi piatanu l'onda
A CANZONA DI A PIUMA
​
Un nà più forza pà tene à so piuma
E i so ditti ùn ponu chè lintà
‘ssa piuma scimità chi hà pigliatu vità
è sola si ni và
piglia d'assaltu una pagina bianca
qui d'accunsentu si lascia svirginà
è ind'u ballu scemu ma senz'à un tremu
principia à cunta
mi chjamu Bianca è so figliola di l'occa
à s'epica qui sirviu à bulà
è oghji so a schiava d'un scrittore
chi m'hà cundannat'à brusgià
ùn si ni parla di i me sacrifizii
nutta sane senza mai piantà
imbuffata d'inchjostru cù a punta torta
mastuccata à vulintà
ùn ti inveni ‘ssa lettera d'amore
è to parolle l'aghju cambiat'in fiore
a me bella scrittura ùn hai più primura
eiu un'sogu piu chi fà
pà una mina, pà un' pezzu di pinu
ùn mi po sacrificà
possu ancu esse in' corpu à un cuscinu
t'aiuteraghju à sunnià
senti o Bianca s' ignozza u scrittore
ti tengu cara ma ti devu brusgià
chi ù to bonu odore mi dà brusgiuri
mi facci affucà
U LAMENTU DI L'ALIVU
O lu meiu lu distinu
Com'edd hè trist'è mischinu
So turnat'à chi mi voli
Si ni sguassenu li pioli oghji ùn hai più cura
O corsu d'a me cultura
D'à me pianta cusi degna
Ni hai fattu li legni sia par fani u focu
O chi scandalu di locu ci cresci machj'è filetta
Chi s'attacc'à l'aliveta
Purtantu tù ti n'inveni
Avii i to ceri pieni ni cuddi anc'à lu terzu
Mi vendii tuttu l'inguernu ùn crignii più l'annata
Dopu la riccolta fatta
D'u me oliu cusi finu
Oghji ùn ni vo più nimu è lu comprani in buteglia
Chi ni sbarca da Marseglia sè ingranditu senza narba
T'imbuffi à l'oliu d'arba
Eru rama di a paci
Eru u fruttu di a luci eru l'arburu di Diu
Prima eru u to invidiu oghji mancu pà u vitu
Nè par dall'à un benedittu
O corsu cio chi tù facci
Ma chi tù ni voghi ‘in paci meritavu più amori
Eru di tantu valori ma d'avemi abbattutu
Un ghjornu sarè pintutu
MUSA VAGABONDA
u ballu di e rime, parolle canterine
belezza di u mondu, musa vagabonda
I memorii spapersi ind' è i tempi persi
parfumu di a vita, parolla mai scritta
u bisognu di dilla, di gioia o di stizza
dulcezza è amore, si spananu cum'à fiore
amore amarezza, pienti è tristezza
discorsi è buccie, è falza meludia
e ùn si po stà muttu, si tast'à u fruttu
tandu corre a piuma, cum' è acqua di fiumu
u bullu di l'aceddi, a luce di i steddi
E rise d'i ziteddi, arcuballen'in celu
​
​
