esciutu in lu 2013
Sorti en 2013
Altri Mente
DI U POPULU
Sentu batta i rimori
D'un' arietta vagabonda,
Chi galoppa è adonda
D'aligria u me cori,
Vuchendu nantu à l'onda
Di riacquisti valori.
Di un versu naturali
Sentu voci muntagnoli,
Innorà più chè lu soli
A bandera naziunali,
È purghjendu à chi voli
A mimoria di Natali.
Sentu a forza tamanta
Di un stintu mai domu,
Nantu à a strada di l'omu
Dapo' l'annati sittanta,
Chi sempri porta lu nomu
Di u populu chi canta.
Sentu l'estru è a fedi
D'anfarti è paghjellaghji,
Intriccià middi viaghji
Versu l'andati ribeddi,
Da tramandà i missaghji
Di l'eterni sintineddi.
Dopu à quaranta brani
Sentu l'ardenti prigheri,
D'ùn veda piantà i sfieri
Di quissi sunnii arcani,
Ma essa i cumpagneri
D'eri oghji è dumani.
Auteur Ghjuvan'Federicu TERRAZZONI
Compositeur Jean-Do LECA
Arrangements Jean-Bernard RONGICONI
SI NE VULIA ANDA
Si ne vulia andà
Senza aspettà à nimu
Cù saccu, funa è fera
È sempre ellu lu primu
Ma qui s'era scurdatu
D'un abbracciu sinceru
È di l'ultimu mottu
À quellu furesteru
È po' di u nostru amore
Si ne vulia andà
Per ùn fà più ritornu
Scruchjà ver' l'aldilà
Sin'à l'ultimu ghjornu
Ma qui s'era scurdatu
Di e parolle appese
Nant'à li sogni vani
Muntagnati in paese
È po' di u nostru amore
Si ne vulia andà
D'aprile o di maghju
Per i chjassi secreti
Di u più bellu viaghju
Ma qui s'era scurdatu
Di u cantu di u ventu
Di u sole di l'estate
Ch'asciuva ogni pientu
È po' di u nostru amore
Puru si n'hè andatu
À batte d'altre sponde
À maghjerà l'eternu
Da rinuvà e stonde
Ma qui forse hà lasciatu
U soiu l'anc'à fà
U sguardu luminosu
Versu a libertà
Per stu tempu chi corre
Ma qui forse hà lasciatu
U soiu l'anc'à fà
U sguardu luminosu
Versu a libertà
Cum 'un segnu d'amore
Auteur Saveriu LUCIANI
Compositeur : Carlu RUTILI
Arrangements Jean-Bernard RONGICONI
ANIMA
U meiu l'ideale
U m'anu lasciatu per tè
Quell i chi, prima chè mè,
Anu muratu issa terra
Da fiuminale à la sarra.
U meiu l'ideale
U m'anu lasciatu per tè ...
A meia la virsura
A m'anu insignata per tè,
Quelli chi ebbenu piacè
À dà capu à u bisognu
Senza chere lu ritornu.
A meia la virsura
A m'anu insignata per tè ...
I mei li sapè
I m'anu amparati per tè
Quelli chi senza avè
Datu manu à i libroni,
Sapianu patta è toni .
I mei li sapè
I m'anu amparati per tè ...
E meie le rivolte
E m'anu inspirate per tè
Quelli chi cum'è mè
Anu lu sangue in bullore
S'ellu hè inghjustu lu dulore.
E meie le rivolte
E m'anu inspirate per tè ...
E meie le canzone
Fà le ribumbà per mè !
Ad ogni generazione
Di li chi ùn ci hè tempu scorsu
È canta o populu corsu
L'anima di issa nazione !
Auteur Cristofanu FILIPPI
Compositeur Jean-Da LECA
Arrangements Jean-Bernard RONGICONI
MADIBA
Privu di celu eu
Sogu statu
Una spira di menti
Hè bastata
In l'odiu cecu
L'oramai oramai Madiba
L'oramai oramai sarà
Un novu andà
Di libertà
A rivolta qui
Mi dici dammi
Una nazioni da
Spart'è spartà
L'arcu di culori
Accindarà
A chjama in Rivonia
Da Soweto più indà
Neru oramai Madiba
U neru un culori sarà
Un alburià
Di fraternità
Circaremu listessu
Meziornu
Sarà longu u caminu
Cù u frastornu
Di l'odiu neru
Prisidenti oramai Mandela
Oramai a to chjama sarà
Strad'à truvà
Per l'unità
Sdrutta a fanga nera
Di l'Apartheid
Pè crescia un antra fedi
Un aldilà
È cù la nova africanità
Venga issa brama avà
Venga issu spirià
Para a me ghjenti chi và
L'oramai oramai sarà
Populu chi sà
A so diversità
Auteur Alanu Di MEGLIO
Compositeur Bruno SUSINI
Arrangements Jean-Bernard RONGICONI
UNA PAR TE
À l'inforsa d'un'alba
O l'alba d'una forza
Accampendu issi turri
Arritti di certezzi
Da u me stintu umanu
Porghju solu un parè
Aghju una Corsica par tè
For' di i mughji più scuri
Ma di l'abbracci veri
Senza muri mucati
Da l'inchjostri più neri
In a fola intricciata
Senza suldati o rè
Aghju una Corsica par tè
(Una par tè)
Da l'antichi Ragguagli
A l'usciu di u Sittanta
Ti conta Pesciu Anguilla
Amadeu lu Turcu
Ni sà centu è po' una
Da francà l'oimè
Aghju una Corsica par tè
Hè quidda di u sulcu
Chi tira a lenza para
U soli candiddighja
Da lacrimi in sudori
Senza vantu nè fumu
Di stantu è di vulè
Aghju una Corsica par tè
In li so risi chjari
O li so raspi amari
Da San Ghjuvà li fochi
A sti vaghjimi bruschi
Da li sciaguri anziani
A l'ora di i piacè
Aghju una Corsica par tè
(Una par tè)
Hè quidda chi ti chjama
Da li so ribbi aparti
Chi ti canta à l'avvena
I so ghjusti rivolti
Una chi era è fù
Chi sarà è ch) hè
Aghju una Corsica par tè
Auteur Alanu Di MEGLIO
Compositeur Bruno SUSINI
Arrangements Jean-Bernard RONGICONI
O TU
O tù
Di e lumere incese
In st'ultimu paese
Quassù
Ma tù
Nant'u mare a vighjola
Da sopr'à Ficaghjola
Dinù
U core apertu
O tù sanghjisippanu
Ai purtatu a bandera
E to paghjelle
À l'orisonte vanu
Per di oghje cio ch'è tù era
O tù
U sguardu cunfraternu
Oghje hà scontru l'eternu
Quassù
O tù
Per Cristu o per a more
Nantu u tempu chi corre
Dinù
U core apertu
O tù sanghjisippanu
Ai purtatu a bandera
E to paghjelle
À l'orisonte vanu
Per di oghje cio ch'è tù era
O tù
Da e prime canzone
À l'ultime passione
Quassù
Dinù
Nant'à estrade nove
In stu cantu chi move
Si tù
E to paghjelle
À l'orisonte vanu
Per di oghje cio ch'è tù era
U core apertu
O tù sanghjisippanu
Porti sempre a bandera
Auteur Saveriu LUCIANI
Compositeur: Carlu RUTILI
Arrangements Jean-Bernard RONGICONI
DIMMI S'ELLU HE LU VERANU
Dimmi s'ellu hè lu veranu
S'ellu hè prontu lu to core
S'ellu vene dinù ellu
A coglie l'ore
Dimmi s'elli si ne vanu
I penseri à l'albore
O si stanu à lu purtellu
A vulà fora
So fresche cum'è u fiore
E propiu belle so l'ore
U sole s'hà da affaccà
Dinù ellu hà da fighjà
Ch 'ellu venga à fà sbuccià
L'avvene chi scalerà
Ghjè u ventu chi l'arreca
I ghjorni di gioia ceca
Cù e so centu carezze
Ind'u core
Ghjè u ventu chi a porta
A l'omi una vita torta
Cù e so centu amarezze
A u core
Vanu propiu cusi l'ore
Sempre appena traditore
Ma ci vole à suppurtà
Ci vole à lascialle andà
Tantu ci vole à campà
A vita chi venerà
Ghjè u ventu chi si tene
Ogni chjave di l'avvene
Cù e so centu incertezze
Ind'u core
Ghjè u ventu chi si porta
I stracci di storia morta
Cù e so centu tristezze
A u core
So fresche cum'è u fiore
E propiu belle so l'ore
U sole s'hà da affaccà
Dinù ellu hà da fighjà
Ch'ellu venga à fà sbuccià
L'avvene chi scalerà
Auteur Ghjacumu FUSINA
Compositeur Jean-Do LECA
Arrangements Jean-Bernard RONGICONI
DUMANDU
Solu dumandu ad avà
Chi a lingua sia viva è prisenti
Torna com'è tandu una surghjenti,
Da tramandà dumani i nosci ramenti.
Solu dumandu ad avà
Chi a manu chi sparghji dolu è pienti
Brusgendu a natura tralucenti,
Sia lampata à mezu à i fiari dulenti.
Solu dumandu ad avà
Chi u statu bugiardu è praputenti,
Dicisu à sarrà omi nucenti
Rindissi cià chi ci hà presu inghjustamenti
Solu dumandu ad avà
Chi spariscanu fami è turmenti
Di issi populi chi nimu ùn senti,
Ma chi sà listessi cà no' ben' chl sfarenti.
Solu dumandu ad avà
Chi'awena ùn sia indiffarenti,
À ugni spiranza di a me ghjenti,
Di campà fidi è uniti eternamenti.
Auteur Leon GIECO
Compositeur Leon GIECO
Arrangements Jean-Bernard RONGICONI
Adaptation Ghjuvan'Federicu TERRAZZONI
U TO SGUARDU
U to sguardu surrisu chi d'amore lucia
Cù tanta l'armunia annant'à lu to visu
Hè scrittu, cumu sia, in eternu indivisu
Ci ferma issu ricordu d'un giuvanottu astutu
Un distinu assulutu cascatu in disaccordu
In lu mumentu mutu, ma di singhjozzu cordu
Di tè ci hè un ritrattu di stampa ripigliatu
U to fiatu strappatu à quella chi t'hà fattu,
Figliulone aduratu, da quellu gestu mattu
Tuttu ognunu rivede a sera sfurtunata
Una stonda affannata, u to sensu duvere
A to prova sguaiata purtata da la fede
Chi possu di avale, lasciati ch'è tù ci ai,
Cù i nostri li guai, u dulore è u male ?
Ma lentate oramai quell'armacce infernale !
Auteur Ghjacumu FUSINA
Compositeur Jean-Do LECA
Arrangements Jean-Bernard RONGICONI
PARLA
O giuvanottu ribellu
O giuvanotta à la moda
Un ti scurdà di u corsu
Adopralu in casa è fora
È tù sia sempre quellu
Chi l'adopra è lu rinova
Un ti vergugnà più d'ellu
Parlalu senza rimorsu
Chi ghjè lu modu più bellu
E forse a più bella prova
Un ti vergugnà più d'ellu
E stringhji lu vechju morsu
Cù lu vechju è lu zitellu
E intrecciali tù la Ioda
Un ti vergugnà più d'ellu
Quand'ellu vene in succorsu
Ancu si à questu è quellu
Ogni tantu ne scumoda
Un ti vergugnà più d'ellu
E dà vita à u so percorsu
Fà ne un bellu castellu
E colla una casa nova
Cum'è una vera scola
Aperta à ogni discorsu
O giuvanottu ribellu
O giuvanotta à la moda
ùn ti scurdà di u corsu
adopralu in casa è fora
Auteur Ghjacumu FUSINA
Compositeur Jean-Do LECA
Arrangements Jean-Bernard RONGICONI
ALTRI MENTI
Oghji u mondu di malcura si ni mori
À u sprufondu manda l'antichi valori,
Chi rispettu, passioni è onori
Senza rigretu so sbanditi da i cori.
Chi a pazzia manda tuttu à caternu
Di un' armunia tramutata in infernu,
Pirdendu l'usu d'ugni sintimu fraternu
L'omu s'hè chjusu in u bughju di l'indernu
Di l'indignità un spavechju si n'hè fattu
È a falsità ferma sempri à l'agguattu,
Chi a so fedi ugnunu si teni piattu
È cio chi credi ùn ni voli fà attu.
À l'oramai hè spapersa a lialtà
È solu guai dumani ci sà appruntà,
Chi senza cura s'affoga l'intimu spirà
D'una cultura fatta tandu d'umanità.
Semu cunvinti chi si po fà altrimenti
Incù u stintu è l'ardori d'altri menti,
Pà rinviviscia i più ghjusti sintimenti
È fà spariscia l'ignuranza di a ghjenti
Auteur Ghjuvan'Federicu TERRAZZONI
Compositeur Jean-Do LECA
Arrangements Jean-Bernard RONGICONI
